महामार्गावर वेगवेगळे दोन अपघात; तिघे गंभीर जखमी

मलकापूर : अज्ञात वाहनाने धडक दिल्याने दुचाकीवरील तिघेजण गंभीर जखमी झाले. पुणे-बंगलोर आशियायी महामार्गावर गोटे गावच्या हद्दीत रविवारी रात्री पावणेदहा वाजण्याच्या सुमारास हा अपघात झाला. तर चालकाचा ताबा सुटून आंब्याचा ट्रक पलटी झाला. येथील कोल्हापूर नाक्यावर सोमवारी सकाळी सहा वाजण्याच्या सुमारास हा अपघात झाला. या अपघातात वाहनासह आंब्याचे लाखो रुपयांचे नुकसान झाले आहे.

प्रशांत प्रकाश थोरात (वय ३०), पूनम प्रशांत थोरात (२८, दोघेही रा. ओंड, ता. कऱ्हाड) व विकास दिलीप देसाई (२८, रा. काळगाव, ता. पाटण) असे दुचाकी अपघातातील जखमी झालेल्या तिघांची नावे आहेत.

याबाबत घटनास्थळावरून व पोलिसांकडून मिळालेल्या माहितीनुसार, विकास देसाईसह थोरात पती-पत्नी दुचाकीवरून साताऱ्याकडे जात होते. रविवारी रात्री पावणेदहा वाजण्याच्या सुमारास उपमार्गावरून पुणे-बंगलोर आशियाई महामार्गावर जात असताना गोटे गावच्या हद्दीत अज्ञात वाहनाने दुचाकीला धडक दिली. या अपघातात दुचाकीवरील तिघेजण गंभीर जखमी झाले. जखमींपैकी एकाची प्रकृती चिंताजनक आहे. अपघाताची माहिती मिळताच पोलिसांनी तातडीने अपघातस्थळी धाव घेतली. जखमींना उपचारासाठी रुग्णालयात हलविले. अपघाताची नोंद शहर पोलीस ठाण्यात झाली असून, हवालदार खलील इनामदार तपास करीत आहेत. धडक देऊन गेलेल्या चारचाकी वाहनांचा पोलीस शोध घेत आहेत. त्यासाठी सीसीटीव्ही कॅमेरे तपासणीचे काम सुरू आहे.

दरम्यान, आंब्याने भरलेला ट्रक (केए ०२ एएच ५९६३) हा कर्नाटकहून मुंबईकडे निघाला होता. पुणे-बंगलोर आशियाई महामार्गावरून जात असताना कऱ्हाड येथे कोल्हापूर नाक्यावर आला असता चालकाचा ट्रकवरील ताबा सुटल्याने पुलाखाली बीमच्या कठड्याला धडकून पलटी झाला. या अपघातात ट्रकसह आंब्याचे लाखो रुपयांचे नुकसान झाले. पुणे-बंगलोर आशियाई महामार्गावर सोमवारी सकाळी सहा वाजण्याच्या सुमारास हा अपघात झाला. या अपघातामुळे काही काळ वाहतूक विस्कळीत झाली होती. अपघातात चालकासह दोघे किरकोळ जखमी झाले आहेत. अपघाताची माहिती मिळताच महामार्ग पोलीस विभागाचे पोलीस निरीक्षक अस्मिता पाटील, अशोक जाधव यांच्यासह पोलीस कर्मचारी व देखभाल विभागाचे कर्मचारी दस्तगीर आगा, जितेंद्र भोसले, अमित पवार, कऱ्हाड शहरचे पोलीस कर्मचारी प्रशांत जाधव, दोन होमगार्ड त्वरित अपघातस्थळी दाखल झाले. त्यांनी जखमींना उपचारासाठी रुग्णालयात पाठवून महामार्गावरील वाहतूक सुरळीत केली. अपघाताची नोंद शहर पोलीस ठाण्यात झाली असून, हवालदार प्रशांत जाधव तपास करत आहेत.

(चौकट)

दैव बलवत्तर म्हणून वाचले...

कोल्हापूर नाक्यावर पुलाखाली अनेक वर्षांपासून भटक्या समाजातील कुटुंबांचा मुक्काम असतो. अपघात झाला त्या वेळी काही फुटांवरच या कुटुंबातील सदस्य झोपले होते. सुदैवाने पलटी झालेला ट्रक पुलासाठी उभारलेल्या बीमच्या कठड्याला धडकून पुढील कठड्यावर पलटी झाला. ट्रक आणखी थोडा पुढे गेला असता तर ते ट्रकखाली व आंब्याखाली सापडले असते. परंतु दैव बलवत्तर म्हणून ते सुखरूप वाचले.

१४मलकापूर अपघात

चालकाचा ताबा सुटल्यामुळे आंब्याचा ट्रक पुलाच्या कठड्याला धडकून पलटी झाला. ( छाया: माणिक डोंगरे)

===Photopath===

140621\img_20210614_150217.jpg

===Caption===

फोटो कॕप्शन

चालकाचा ताबा सुटल्यामुळे आंब्याचा ट्रक पुलाच्या कठड्याला धडकून पलटी झाला. ( छाया-माणिक डोंगरे)