वाढे येथे हॉटेलचालकाला लुटणाऱ्या दोघांना अटक

लोकमत न्यूज नेटवर्क

सातारा : तालुक्यातील वाढे गावच्या हद्दीत एका हॉटेलचालकाला अडवून त्याच्या गळ्यातील दोन तोळे वजनाची सोन्याची चेन आणि आठ हजारांचा मोबाईल असा ६८ हजारांचा ऐवज लुटणाऱ्या चौघांवर सातारा तालुका पोलीस ठाण्यात गुन्हा दाखल झाला आहे.

सातारा तालुका गुन्हे प्रकटीकरण शाखेने लुटमारीत सहभागी असलेल्या संशयितांपैकी दोघांना अटक केली आहे. पैकी एकजण अल्पवयीन असल्यामुळे त्याची रवानगी रिमांड होममध्ये करण्यात आली आहे. लूटमार करणाऱ्यामध्ये एकजण अनोळखी असून, त्याचा शोध पोलीस घेत आहेत. दरम्यान, सौरभ मंडलिक आणि शेखर सर्वगोड अशी अटक करण्यात आलेल्याची नावे आहेत.

याबाबत अधिक माहिती अशी की, मयूर चंद्रकांत देशमुख (वय २५, रा. निसराळे, ता. सातारा) हा युवक हॉटेल व्यवसायिक असून, शुक्रवारी (दि. १९) रात्री पावणेअकरा वाजण्याच्या सुमारास ते आपल्या दुचाकीवरून निघाले असताना त्यांना वाढे गावच्या हद्दीत असणाऱ्या पुलाच्या पुढे सौरभ पोपट मंडलिक, शेखर रवींद्र सर्वगोड, एक अल्पवयीन मुलगा (सर्व, रा. प्रतापसिंह नगर, ता. सातारा) आणि लाल रंगाचा शर्ट घातलेला एक अनोळखी मुलगा असे चौघांनी अडविले. या चौघांनी मयूर याला धक्काबुक्की, शिवीगाळ करीत दमदाटी करण्यास सुरुवात केली. चौघांनी त्याच्या हातातील आठ हजार रुपये किमतीचा मोबाईल, मोटारसायकलची चावी आणि गळ्यातील दोन तोळे वजनाची सोन्याची चेन जबरदस्तीने हिसकावून घेतली आणि ते पळून गेले.

याप्रकरणी मयूर देशमुख यांनी सातारा तालुका पोलीस ठाण्यात तक्रार दिल्यानंतर पोलिसांनी संशयितांचा शोध सुरू केला. यानंतर सहायक पोलीस अधीक्षक आंचल दलाल यांनी घटनास्थळी भेट देऊन पोलिसांना तपासाच्या सूचना दिल्या होत्या. त्यानुसार सातारा तालुका गुन्हे प्रकटीकरण शाखेने तपास सुरू केला होता. डीबीला मिळालेल्या माहितीनुसार यामध्ये सहभागी असणाऱ्या संशयितांची नावे समोर आली होती. त्यानुसार शोध घेतला असता पोलिसांनी शनिवारी (दि. २०) सौरभ पोपट मंडलिक आणि शेखर रवींद्र सर्वगोड याला अटक केली. दरम्यान, तिसऱ्या संशयितालाही यावेळी ताब्यात घेण्यात आले; मात्र तो अल्पवयीन असल्यामुळे त्याची रवानगी रिमांड होममध्ये करण्यात आली.

या कारवाईत सहायक पोलीस निरीक्षक अभिजित चौधरी, पोलीस नाईक सुजित भोसले, पोलीस कॉन्स्टेबल सागर निकम, उत्तम पवार सहभागी झाले होते.