साताऱ्यातील कोविड सेंटरला खडा पहारा

सातारा : जिल्ह्यात कोरोनाचे रुग्ण संख्या वाढत असून, कोरोना सेंटरवर सध्या परिस्थिती कशी आहे याचा ‘लोकमत’ने रविवारी रियालिटी चेक केला असता या दोन्ही कोरोना सेंटरवर खडा पहारा असल्याचे पाहायला मिळाले. एवढेच नव्हे, तर कोरोना सेंटरमध्ये रुग्णाशिवाय कोणालाही प्रवेश दिला जात नव्हता.

जिल्ह्यात गतवर्षी सारखी यंदाही परिस्थिती उद्भवण्याची चिन्हे आहेत. हळूहळू कोरोना सेंटर रुग्णांनी हाऊसफुल होऊ लागले आहेत. रुग्णांची काळजी घेण्याबरोबरच बाहेरच्या व्यक्तीशी संपर्क येऊ नये म्हणून कोरोना सेंटरमध्ये नेमकी परिस्थिती काय आहे, याची ‘लोकमत’ने रविवारी प्रत्यक्षात जाऊन माहिती घेतली. त्यावेळी सातारा बसस्थानकात शेजारी असणाऱ्या जम्बो कोरोना सेंटरमध्ये बाहेर प्रवेशद्वाराजवळच दोन मुली रिसेप्शनिस्ट म्हणून काम करीत असल्याच्या पाहायला मिळाल्या. या मुली आतमध्ये ये-जा करणाऱ्यांना चौकशी करतात. रुग्णाशिवाय आतमध्ये कोणालाही सोडत नाहीत. नातेवाइकाचे नाव नोंद करून त्यांना बाहेर बसावे, अशा सूचना करतात. ‘लोकमत’च्या प्रस्तुत प्रतिनिधीने आपली ओळख न सांगता थेट कोविड सेंटरमध्ये जाण्याचा प्रयत्न केला. त्यावेळी तेथील मुलीने त्यांना अडविले आपल्याला आतमध्ये जाता येणार नाही. कोणालाही भेटता येणार नाही. आपण इथेच थांबा असे त्यांना सांगण्यात आले. जिल्हा शासकीय रुग्णालयातील कोरोना सेंटरमध्ये हीच परिस्थिती होती. तेथेही कोरोना सेंटरच्या प्रवेशद्वाराजवळ महिला सुरक्षा रक्षक नेमण्यात आले आहेत. या महिला आतमध्ये कोणालाही सोडत नव्हत्या. एक तर कोरोना सेंटरमध्ये जाण्यासाठी कोणी धजावत नाही. मात्र, नकळत काहीजण नातेवाइकांना पाहण्यासाठी जाण्याचा प्रयत्न करतात, अशा रुग्णांना या महिला सुरक्षा कर्मचारी अडवत होत्या.

चौकट: गेटवरच नाव नोंदणी

रुग्णवाहिकेतून कोरोनाबाधित पेशंटला सेंटरमध्ये आणल्यानंतर त्याची प्रवेशद्वाराजवळच नाव नोंदणी करून रुग्णाला आतमध्ये नेले जाते. सोबत असलेला नातेवाइकाला तुम्ही घरी जावा असा सल्ला दिला जात होता. सकाळी आणि संध्याकाळी रुग्णाची प्रकृती कशी आहे, हे सांगण्यासाठी डॉक्टर प्रवेशद्वाराच्या बाहेर येतात. मात्र, आतमध्ये कर्मचारी, डॉक्टर यांच्याशिवाय कोणीही जात नव्हते.

चौकट : सिव्हिलमध्ये असणाऱ्या कोरोना सेंटरमध्ये तर कोणीच फिरकत नाही. नागरिकांमध्ये मुळात कोरोनाबाबत अद्यापही भीती आहे. त्यामुळे मुद्दामहून कोणी कोरोना सेंटरमध्ये फिरकत नाही. केवळ कोरोना सेंटरचा फलक वाचल्यानंतर लोकं तिकडे फिरकतही नाहीत; पण काहीजण रुग्णांना बघण्याच्या निमित्ताने कोरोना सेंटरमध्ये प्रवेश करण्याचा प्रयत्न करतात. अशा लोकांना महिला सुरक्षारक्षक अडवीत होत्या.

कोट : जिल्हा शासकीय रुग्णालयातील कोरोना सेंटरमध्ये नातेवाइकालाही प्रवेश दिला जात नाही. जोपर्यंत रुग्ण आमच्या रुग्णालयात उपचार घेत आहे. तोपर्यंत आम्ही कोणालाही भेटू देत नाही. पूर्णपणे बरा झाल्यानंतरच रुग्ण घरी सोडला जातो. त्यावेळी नातेवाइकांना रुग्णाला भेटता येते, पण रुग्णालयात आम्ही प्रचंड खबरदारी घेतो.

डॉ. सुभाष चव्हाण, जिल्हा शल्यचिकित्सक