Local Body Election: 'स्विंग वोटर्स'चे निवडणूक आयोगासमोर आव्हान

मतदारांना आमिष दाखवण्याचे गैरप्रकार रोखण्यासाठी भरारी पथके

सातारा : नगरपालिकांच्या निवडणुकीत मतदारांची संख्या कमी असल्याने एकेक मत महत्त्वाचे असते. अशा परिस्थितीत आमिषाला बळी पडणारे मतदार म्हणजचेच स्विंग वोटर्सना आदल्या दिवशी किंवा रात्री रोख वाटपाचे, जेवणावळी आदींचे प्रलोभन दाखवून प्रभाव टाकण्याचे प्रकार चुपके-चुपके होवू लागले आहेत. असे प्रकार रोखण्याचे निवडणूक आयोगापुढे मोठे आव्हान आहे.

प्रलोभनांची रेलचेल वाढली

जिल्ह्यात पालिका निवडणूक अवघ्या तीन दिवसांवर आली आहे. त्यामुळे मतदारांना आकर्षित करण्यासाठी अनेक प्रलोभनांचे प्रकार सुरू झाले आहेत. शहरातील अनेक भागांत रात्री जेवणाचे कार्यक्रम, हॉटेलमधील गुप्त बैठकांसाठी होणारे खर्च हे उमेदवार थेट न देता त्यांच्या कार्यकर्त्यांकरवी भागवले जात असल्याची माहिती पुढे येत आहे. त्यामुळे संबंधित उमेदवाराचे खात्यावर व्यवहार दिसत नसले तरी खूप आधी हे विश्वासू कार्यकर्त्यांकडे रक्कम सुपूर्द केली असण्याची शक्यता वर्तवली जात आहे.

आदल्यादिवशी सतर्कता आवश्यक

प्रचार थांबल्यानंतरच्या रात्रीपासून पैसे वाटप होण्याची जास्त असते. यासाठी जागरूक कार्यकर्ते सतर्क असतात. तथापि, ही आयोगाचीही जबाबदारीही आहे. त्यामुळे स्विंग वोटर्सवर प्रभाव टाकणारे प्रकार रोखण्यासाठी आयोगाने कडक पावले उचलण्याची आवश्यकता व्यक्त होत आहे.

भरारी पथके वाढविण्याची गरज

निवडणुकीच्या काळात सर्व प्रभागांत भरारी पथके, निरीक्षण पथके आणि उशिरापर्यंत गस्त वाढवण्याची गरज आहे. तसेच मोठ्या आर्थिक व्यवहारांची पडताळणी, संशयास्पद हालचाली, रात्री उशिरा फिरणारी वाहने, हॉटेलमधील चहापान किंवा कार्यक्रमांच्या आडून होणाऱ्या व्यवहारांवर कठोर नजर ठेवणे अनिवार्य ठरत आहे.

स्विंग वोटर?

मतदारांपैकी काही जण विशिष्ट पक्षाशी किंवा विचारांशी बांधील असतात. मात्र काही मतदारांचे निर्णय मतदानाच्या अगदी शेवटच्या क्षणापर्यंतही ठरलेले नसतात. हेच मतदार म्हणजे स्विंग वोटर्स. साधारणतः आर्थिकदृष्ट्या दुर्बल कुटुंबातील मतदारांना ओळखून काही उमेदवार विविध आमिषे दाखवून त्यांना आकर्षित करण्याचा प्रयत्न करतात. कांटे की टक्कर असलेल्या प्रभागांत एकेक मत निर्णायक ठरू शकते; त्यामुळे अशा ठिकाणी पैसे वाटपासारखे प्रकार होण्याची शक्यता अधिक असते.

सातारा नगरपालिकेच्या निवडणुकीत कोणताही गैरप्रकार होऊ नये, यासाठी दोन भरारी पथके नियुक्त केली आहेत. त्याचप्रमाणे नागरिकांकडून तक्रार आल्यास त्वरीत कारवाई करण्यात येणार आहे.  - आशिष बारकूल, निवडणूक निर्णय अधिकारी, सातारा