पास मिळविण्यासाठी विद्यार्थ्यांची ससेहोलपट

विद्यार्थ्यांची अवस्था : शैक्षणिक नुकसानामुळे पालकही त्रस्त

शामगाव : शामगाव परिसरातील विद्यार्थ्यांची गेल्या काही दिवसांपासून पास मिळवण्यासाठी रोजची धावाधाव सुरू आहे. विद्यार्थ्यांना पाससाठी तासन्तास रखडावे लागत असल्याने त्यांच्या शैक्षणिक नुकसानामुळे पालकही त्रस्त झाले आहेत. ‘प्रवाशांच्या सेवेसाठी’ हे ब्रिदवाक्य एसटी महामंडळाकडून नेहमीच मिरवले जाते; परंतु वास्तविक पाहता त्यांच्याकडून वेळोवेळी प्रवाशांची गैरसोयच केली जात असते. शामगाव परिसरातील सुमारे ५00 विद्यार्थी शाळा तसेच महाविद्यालयात शिकण्यासाठी विद्यानगर आणि कऱ्हाड परिसरात जात असतात. या सर्व विद्यार्थ्यांना कऱ्हाड बस आगारात शैक्षणिक मासिक पास मिळवण्यासाठी तासन्तास रखडावे लागते. यावर पर्याय म्हणून शामगाव, अंतवडी, राजाचे कुर्ले येथील विद्यार्थी पास काढण्यासाठी पुसेसावळी येथे जात असतात. गेल्या वर्षी या परिसरातील विद्यार्थ्यांची पास काढण्याची सोय पुसेसावळीमध्ये करण्यात आली होती. परंतु, यावर्षी या विद्यार्थ्यांना ‘तुमचे गाव खटाव तालुक्यात नसल्यामुळे तुम्हाला पुसेसावळीतून पास काढून मिळणार नाही,’ असे सांगण्यात येते. त्यामुळे विद्यार्थ्यांना कऱ्हाड येथे जाऊन लांबलचक रांगेत उभे राहण्याशिवाय पर्याय राहत नाही. कऱ्हाडातूनही या विद्यार्थ्यांना कृष्णा कॅनॉल ते शामगाव व इतरत्र असाच पास देण्यात येतो. अनेक विद्यार्थ्यांना कॉलेज सुटल्यानंतर खासगी क्लास किंवा इतर काही कामांसाठी कऱ्हाडमध्ये जावे लागते. त्यांचा पास कऱ्हाडपर्यंत चालत नसल्यामुळे घरी परतताना त्यांना नाईलाजाने कॅनॉलपर्यंत तिकीट काढावे लागते. यामुळे आर्थिक परिस्थिती बेताची असणाऱ्या विद्यार्थ्यांच्या खिशाला आर्थिक चटका सहन करावा लागतो. कऱ्हाडात पाससाठी लांबलचक रांगेत उभे राहून अभ्यासाचा वेळही वाया जात असतो. हे टाळण्यासाठी एसटी महामंडळाने शामगाव परिसरातील विद्यार्थ्यांना पूर्वीप्रमाणे पुसेसावळी येथून पास देण्याची व्यवस्था करावी, अशी मागणी होत आहे. (वार्ताहर)