चिमुकल्या हातांनी दिला मातीला आकार

पर्यावरणपूरक गणेशोत्सव : मुलांनी घडविल्या गणेशमूर्ती; पालकांचाही उत्स्फूर्त प्रतिसाद

सातारा : बालगोपाळांमध्ये सध्या माय फ्रेंड गणेशाची भलतीच क्रेझ आहे. जणू काही गणपती बाप्पांशी मुलांची गट्टीच जमलीय. म्हणूनच की काय चिमुकल्या हातांनी मातीला आकार देत आपल्या लाडक्या बाप्पाची मूर्ती बनविताना ही मुलं आनंदून गेली. कुणी आसनावर विराजमान गणेशमूर्ती बनविली तर कुणी खोडकर बालगणेश साकारला. कलेची देवता असणाऱ्या बाप्पांची नानाविध रूपं मुलांनी चित्रातून आणि मातीतून साकारण्याचा प्रयत्न केला.
पर्यावरण रक्षणासाठी सातारकरांनी ‘लोकमत’च्या मोहिमेस दिलेला प्रतिसाद वाखाणण्याजोगा आहे. विचारांची पेरणी तर झाली आहे. आता त्याला कृतीची जोड देण्याची वेळ आली आहे. याच प्रेरणेतून वंडरबार किड्स प्री-प्रायमरी स्कूल आणि संस्कृती कला अकादमी यांनी लहान मुलांसाठी पर्यावरणपूरक गणेशमूर्ती आणि रंगभरणाची कार्यशाळा आयोजित केली होती.
या कार्यशाळेत पर्यावरणपूरक गणेशमूर्ती कशा तयार करायच्या याचे प्रात्यक्षिक संस्कृती कला अकादमीचे अध्यक्ष प्रसाद चव्हाणयांनी दाखविले. चिखलाच्या गोळ्यांना आकार देऊन कमी वेळेत सुंदर गणेशमूर्ती साकारलेली पाहून मुलं हरखून गेली. त्यानंतर मुलांनी आपल्या पालकांच्या मदतीने गणेशमूर्ती बनविण्याचा प्रयत्न केला. स्वत:च्या हातांनी आपल्या लाडक्या बाप्पांची मूर्ती तयार करताना मुलांचा आनंद ओसंडून वाहत होता. प्रत्येकाची मूर्ती वेगळी होती, कारण प्रत्येकाने आपल्या मनात असणाऱ्या श्री गणेशाची मूर्ती बनविण्याचा प्रयत्न केला होता. हुबेहूब गणेशमूर्ती बनविता आली नसली तरी चिमुकल्यांच्या भावना मात्र त्यात उतरल्या होत्या. यावेळी पर्यावरणपूरक गणेशमूर्ती कशा रंगवायच्या, कोणते रंग वापरायचे, या बाबींचे शास्त्रोक्त प्रशिक्षणही मुलांना देण्यात आले. तसेच चित्रांत रंग कसे भरायचे याचे सोपे प्रकारही मुलांना शिकविण्यात आले.
या कार्यशाळेस कर्तव्य सोशल ग्रुपच्या अध्यक्षा वेदांतिकाराजे भोसले यांनी भेट दिली. चिमुकल्या हातांनी बनविलेल्या गणेशमूर्ती पाहून त्यांनी सर्वांचे कौतुक केले. स्कूलच्या शाखाप्रमुख सुनिता पवार, शिक्षक विशाखा निकम, स्वाती मोरे, अनुराधा मेनकुदळे, श्रीकांत पवार यांनी सहकार्य केले. (प्रतिनिधी)
बालकलेची भरले प्रदर्शन
कार्यशाळेत मुलांनी बनविलेल्या सर्व गणेशमूर्तींचे आणि रंगभरण केलेल्या चित्रांचे प्रदर्शन भरविण्यात आले. आपणच आपल्या हातांनी बनविलेल्या मूर्ती न्याहाळताना मुलांच्या चेहऱ्यावरील आनंद शतगुणित झाला होता. यावेळी विजय मांडके, चित्रकार सागर गायकवाड, प्रा. विजय माने उपस्थित होते. मान्यवरांच्या हस्ते विद्यार्थ्यांना बक्षिसे देण्यात आली.
पालकही बनले मूर्तिकार
या कार्यशाळेत मुलांबरोबरच पालकांनीही सहभाग घेतला. मुलांवर चांगले संस्कार घडवून त्यांच्या आयुष्याला आकार देणारे पालक यावेळी मातीला आकार देऊन सुंदर गणेशमूर्ती साकारण्याची कला शिकले. तसेच यंदाच्या गणेशोत्सवात आपण स्वत: पर्यावरणपूरक गणेशमूर्ती बनवून तिची घरात प्रतिष्ठापना करणार असल्याचेही पालकांनी बोलून दाखविले.