सातारची मंत्रिपदाची पाटी कोरी !

चार दशकांची परंपरा खंडित : शंभूराज देसाई यांच्या रुपाने होती एकमेव आशा

सातारा : मुख्यमंत्री देवेंद्र फडणवीस यांच्या सरकारमध्ये शुक्रवारी नव्याने वीस मंत्र्यांचा शपथविधी झाला. यावेळीही सातारा जिल्ह्यातून पाटणचे आमदार शंभूराज देसाई यांचा समावेश होईल, अशी चर्चा राजकीय वर्तूळात होती. मात्र, सातारची पाटी मंत्रीपदाच्या रस्सीखेचीत कोरीच राहिली आहे. सातारा जिल्ह्याला मंत्रिपद मिळाले नसल्यामुळे मंत्रिपदाची गेल्या चार दशकाची परंपरा आता खंडित झाली आहे.
दरम्यान, शिवसेनेच्या वाट्याची दोन मंत्रीपदे अजून बाकी असून या विस्तारात तरी सातारचा समावेश होईल की नाही, याविषयी सांशकताच आहे.
महाराष्ट्राच्या स्थापनेनंतर राज्याच्या सूत्रे अनेकदा सातारा जिल्ह्याच्या हातीच राहिली आहेत. विशेष म्हणजे मालोजीराजे नाईक-निंबाळकर यांनी मुंबई प्रांतात मंत्री म्हणून काम केले आहे. यशवंतराव चव्हाण, बॅ. बाबासाहेब भोसले, पृथ्वीराज चव्हाण यांनी महाराष्ट्राचे मुख्यमंत्रीपद सांभाळले आहे. विलासराव पाटील-उंडाळकर, अभयसिंहराजे भोसले, यशवंतराव मोहिते, बाळासाहेब देसाई, मदनराव पिसाळ, रामराजे नाईक-निंबाळकर, श्याम अष्टेकर, शशिकांत शिंदे यांनी मंत्री म्हणून काम पाहिले आहे. गेली चार दशकाहून अधिक काळ सातारच्या वाट्याला नेहमीच लाल दिवा मिळाला आहे. मात्र, मंत्रिमंडळाच्या दुसऱ्या विस्तारात ही पंरपरा आता खंडित झाली आहे.
मुख्यमंत्री देवेंद्र फडणवीस यांच्या सरकारमध्ये मंत्रिमंडळात मराठवाडा आणि विदर्भाला प्राधान्य देण्यात आल्याचे स्पष्ट झाले आहे. दरम्यान, पश्चिम महाराष्ट्रात सातारा जिल्हा वगळता सांगली, कोल्हापूर, सोलापूर आणि पुणे जिल्ह्यात भाजपबरोबरच शिवसेनेही चांगले यश मिळविले आहे. कोल्हापूरात तर शिवसेनेने काँग्रेसचा सफाया केला. त्यामुळे या विस्तारात कोल्हापूरला शिवसेनेकडून मंत्रिपदाची संधी दिली जाईल, अशी अपेक्षा होती. मात्र, तीही फोल ठरली. सांगली जिल्ह्यालाकडेही भाजप आणि शिवसेनेने दुर्लक्ष केले आहे.
जिल्ह्यात आठ विधानसभा मतदारसंघ असून पाच मतदारसंघ राष्ट्रवादीकडे तर दोन काँग्रेस आणि एक शिवसेनेकडे आहे. जिल्ह्यातील शिवसेनेचे एकमेव आमदार शंभूराज देसाई असून ते पाटणमधून विजयी झाले आहेत. शंभूराज यांना राज्यमंत्रीपद निश्चित झाल्याचे मानल्याची चर्चा रंगल्याने पाटण मतदारसंघातील शेकडो कार्यकर्ते मुंबईला रवाना झाले होते.
मात्र, त्यांचीही घोर निराशा झाली आहे. भाजपचा घटक पक्ष असणाऱ्या राष्ट्रीय समाज पक्षाचे अध्यक्ष महादेव जानकर यांच्या नावाची गेले अनेक दिवस चर्चा सुरू होती.
भाजपचे राष्ट्रीय अध्यक्ष अमित शहा यांनी मंत्रिपदाचा शब्द दिल्याचा दावाही जानकर यांनी प्रसारमाध्यमांसमोर केला होता. मात्र, त्यांचेही मंत्री होण्याचे स्वप्न अधूरे राहिले आहे. (प्रतिनिधी)


पालकमंत्री कोण..?
नवीन मंत्रिमंडळाच्या विस्तारानंतर सातारचे पालकमंत्री कोण..? हा विषय आता पुन्हा एकदा चर्चेला आला आहे. महादेव जानकर यांचा मंत्रिमंडळात समावेश होईल आणि सातारचे पालकमंत्रीही तेच राहतील, अशी राजकीय चर्चा सुरू होती. मात्र, त्यांचे नावच नसल्यामुळे ही चर्चा आतातरी धुसर झाली आहे. दरम्यान, गिरीश बापट यांचा समावेश झाल्यामुळे ते आता पुण्यावर दावा करणार, याविषयी कोणतेही दुमत नाही. दिवाकर रावते हे कॅबिनेट मंत्री तर विजय शिवतारे राज्यमंत्री झाले आहेत. त्यामुळे त्यांच्यापैकी एकाचे नाव निश्चित होऊ शकते, असेही मानले जात आहे. रावते यांनी पश्चिम महाराष्ट्राची जबाबदारी सांभाळल्यामुळे आणि त्यांनी साताऱ्यात बऱ्यापैकी सेनेची पायाभरणी केल्यामुळे त्यांचा नावाचा विचार होऊ शकतो, असे सातारा जिल्ह्यातील शिवसैनिकांना वाटते.