जनतेची एसटीसाठी परवड; सदस्य विमानाने ‘टूर’वर

पाटण : कोरोना महामारीशी लढताना एकीकडे दुर्गम पाटण तालुक्यातील जनतेला एसटी मिळविण्यासाठीही जिवाचा आटापिटा करावा लागतोय. मात्र, याच कोरोना महामारीत पंचायत समितीचे सदस्य मात्र विमानाने ‘टूर’वर गेलेत. लाखो रुपये खर्चून केरळ राज्यात काढण्यात आलेला हा अभ्यास दौरा सध्या चर्चेचा विषय ठरला असून, या दौऱ्याचे फलीत काय, हा जनतेचा प्रश्न आहे.

तालुक्याचे मिनी सभागृह म्हणून ओळखल्या जाणार पाटण पंचायत समितीच्या फक्त महिला सदस्यांसाठी अभ्यास दौऱ्याचे आयोजन असताना नुकतेच केरळ राज्याच्या दौऱ्यावर सभापती, उपसभापतींसह काही सदस्यही गेले आहेत. या दौऱ्याची तालुक्यात मोठी चर्चा आहे. अभ्यासाला गेलेले सदस्य तालुक्यातील जनतेसाठी काय घेऊन येणार, हा संशोधनाचा विषय आहे. या दौऱ्यासाठी सुमारे पाच ते दहा लाखांचा खर्च अपेक्षित असून, केरळ येथे पोहोचण्यासाठी सदस्यांनी विमानाने प्रवास केल्याची चर्चा आहे. सभापती म्हणून राजाभाऊ शेलार, तसेच उपसभापती म्हणून प्रतापराव देसाई आणि गटविकास अधिकारी म्हणून मीना साळुंखे यांच्यावर प्रमुख जबाबदारी आहे. पंचायत समितीच्या सभागृहात माजी मंत्री विक्रमसिंह पाटणकर यांच्या गटाची सत्ता आहे, तर विरोधक म्हणून सध्याचे मंत्री शंभूराज देसाई यांचे सहा सदस्य आहेत. नुकतेच सभापती, उपसभापती आणि विरोधी पक्षनेते यांनी एकत्रितपणे अभ्यास दौरा म्हणून केरळ राज्यात ‘टूर’ काढली आहे. यापूर्वीही अशा प्रकारचे अभ्यास दौरे आणि सहली पंचायत समिती सदस्यांनी अनुभवलेले आहेत. सदस्यांचा अभ्यास दौरा जरूर असावा. त्यामध्ये आक्षेप घेण्यासारखे काही नाही. सभागृहात नवीनच आल्यानंतर पंचायत समिती सदस्यांना अशा अभ्यास दौऱ्याची गरज असते. मात्र, आता पंचायत समितीचा कार्यकाल केवळ एक वर्षाचा उरला असताना काढलेला अभ्यास दौरा हा जनतेसाठी फलदायी ठरणार की केवळ मौजमजा, हा प्रश्न आहे.

पंचायत समितीतील सदस्यांचा गत कार्यकाल पाहिला असता मोजकेच सदस्य जनतेच्या प्रश्नासाठी तळमळीने बोललेले दिसले तर अनेकजण मासिक सभेला दांडी मारतात. तसेच बरेचजण तोंडावर बोट ठेवून केवळ सभेला हजेरी लावण्यापुरते उपस्थित राहिलेले दिसतात. तेव्हा आता अभ्यास दौरा करून सदस्यांनी इतर राज्यांत काही पाहिले, अनुभवले तर त्याची परत आल्यावर तळमळीने अंमलबजावणी होते की नाही, हे पाहावे लागणार आहे.

गत पाच वर्षांच्या कार्यकाळात अभ्यास दौऱ्यासाठी विमानानेच गेलेले सदस्य प्लास्टिक मुक्तीचा आम्ही ध्यास घेऊन आलो आहे, असे सांगत होते; पण त्यांचा हा ध्यास अल्पकाळातच विरून गेला. तालुक्यात प्लास्टिक मुक्ती झालीच नाही. म्हणूनच अभ्यास दौऱ्याला गेलेल्या सदस्यांना आपण जाऊन काय केले, याचे अंतर्मुख होऊन विचार करणे भाग पडणार आहे.

- चौकट

केरळ कोरोनाचा ‘हॉटस्पॉट’

सध्या सर्वत्र कोरोनाने पुन्हा डोके वर काढले असून, राज्य सरकार ‘लॉकडाऊन’ करण्याच्या विचारात आहे. सर्वत्र सभा, यात्रा, समारंभ, सहली यावर बंदी आहे. असे असताना पाटण पंचायत समितीचे सदस्य केरळ राज्याच्या अभ्यास दौऱ्यावर गेले आहेत. त्यातच केरळमध्ये कोरोनाचा प्रभाव जास्त आहे. त्यामुळे अभ्यास दौऱ्यावरून परत येणाऱ्या पंचायत समिती सदस्यांची तालुक्यात प्रवेश करण्यापूर्वी कोरोना चाचणी होणार का, असा प्रश्न उपस्थित होत आहे.