फलटण तालुक्यात विजांच्या कडकडाटासह पावसाची हजेरी

फलटण : फलटण शहर व परिसरात मागील काही दिवसांपासून ढगाळ हवामानासह वादळी वारा सुटत आहे. रविवारी सायंकाळी साडेचारपासून शहरासह उपनगरांमध्ये ढगाळ हवामानासह वादळी वारा सुटला अन् विजांचा कडकडाटासह अवकाळी पावसाने जोरदार हजेरी लावली. संध्याकाळी साडेपाच वाजेपर्यंत शहरात व उपनगरात वादळी वाऱ्यासह पाऊस मोठ्या प्रमाणात झाला.

फलटणसह परिसरात रविवारी दुपारी तीनपासूनच शहरात ढगाळ हवामान तयार झाल्याने उकड्याचा अधिक त्रास जाणवत होता. नागरिक घरात असतानाही उकाड्याने घामाघूम झाले. सायंकाळी साडेचारपासून वातावरणात अचानकपणे बदल झाला आणि आकाशात ढगांनी अधिकच गर्दी केली. सोसाट्याचा वादळी वारा सुटला. आकाशात विजा चमकू लागल्या अन् ढगांचा गडगडाटही वाढला. काही वेळेतच शहराच्या मध्यवर्ती भागासह शहराच्या उपनगरांमध्ये पावसाला सुरुवात झाली.

महात्मा फुले चौक, डी. एड. कॉलेज चौक, पृथ्वी चौक व कोळकी या भागात पावसाचा वेग अधिक राहिला तर विडणीमध्येही जोरदार पावसासह गारांचा वर्षावही झाला. तालुक्यातील काही भागांत मध्यम स्वरूपाच्या सरी कोसळल्या. काही वेळेतच रस्त्यांवरून पाण्याचे पाट वाहू लागले होते.

साडेचार वाजेपासून टपोरे थेंब पडण्यास सुरूवात झाली अन् काही मिनिटांतच सरी कोसळू लागल्याने घराबाहेर पडलेल्या नागरिकांसह दुकानदारांची त्रेधातिरपिट उडाली. वादळी वारा सुटताच शहरासह उपनगरांमधील विद्युतपुरवठा महावितरणकडून नेहमीप्रमाणे खंडित करण्यात आला होता. वादळी वारा थांबताच पुन्हा वीजपुरवठा पूर्ववत केला गेला.

पावसाने उघडीप देताच काही उपनगरीय परिसरांमध्ये अस्ताला जाणाऱ्या सूर्यनारायणाने दर्शन दिल्याने अल्हाददायक वातावरण अनुभवयास आले.

मागील काही दिवसांपासून शहरात उन्हाची तीव्रता अधिकच जाणवत होती. पारा चाळिशीला टेकल्याने वातावरणात उष्मा कमालीचा वाढला होता. अवकाळी पावसाने सायंकाळी लावलेल्या दमदार हजेरीमुळे वातावरण काही प्रमाणात थंड झाल्याने उकाड्यापासून नागरिकांना संध्याकाळनंतर दिलासा मिळाला. मागील चार ते पाच दिवसांपासून कमाल व किमान तापमानात वाढ होत होती; मात्र पावसामुळे रविवारी नागरिकांना अल्हाददायक वातावरणाने दिलासा मिळाला.

फोटो २२फलटण-रेन

फलटण येथील माळजाई परिसरात रविवारी पावसाने हजेरी लावली होती. (छाया : नसीर शिकलगार)