पोलीस मदत केंद्र पोलिसांच्या प्रतीक्षेत

आदर्की फाटा : धोकादायक प्रवासाने प्रवासी त्रस्त

पिंपोडे बुद्रुक : सातारा-पुणे राज्य महामार्गावर वाठार स्टेशनजवळ आदर्की फाट्यावर पोलीस मदत केंद्र आहे. सध्या या मदत केंद्राला कुलूप लावल्याने हे मदत केंद्रच पोलिसांच्या प्रतीक्षेत आहे.
वाठार स्टेशन, तडवळे सं. वाघोली, ता. कोरेगावच्या हद्दीतून सातारा-लोणंद-नीरा मार्गे पुणे हा राज्य महामार्ग जातो. स्पर्धेच्या युगात रस्त्यावरील वाढते दळणवळण आणि नित्याच्या वाहतुकीमुळे अनेक समस्या सतत निर्माण होत असतात. या महामार्गावर आदर्की फाटा येथे १९९९ मध्ये पोलीस मदत केंद्राची स्थापना करण्यात आली. तत्कालीन पोलीस अधीक्षक मीरा बोरवणकर यांच्या हस्ते या मदत केंद्राचे उद्घाटन करण्यात आले.
आदर्की फाट्यावरून पुढे सालपे घाट लागतो. त्यामुळे निर्मनुष्य घाट रस्ता आणि तेथून अलीकडे वाठार स्टेशनपर्यंतचा हा रस्ता चोऱ्यांसाठी प्रसिद्ध आहे. या मार्गावर रात्रीच्या वेळी दुचाकीस्वारास एकटे गाठून तसेच विरळ वाहतुकीचा गैरफायदा होऊन एखाद्या चारचाकी वाहनास अडवून प्रवाशांना लुटल्याचे व गंभीर मारहाण झाल्याचे प्रकार यापूर्वी अनेकदा घडले आहेत. यामुळे सालपे घाट ते आदर्की फाटा हा ‘डेंजर झोन‘ म्हणून प्रवाशांमध्ये प्रसिद्ध आहे.
सद्य:स्थितीत आदर्की फाट्यावर हॉटेल्स, ढाबे, परमीट रूम यांची रेलचेल झाली आहे. त्याचबरोबर राज्याबरोबरच परराज्यातूनही होणारी अवजड वाहतूकही या मार्गावर खूप मोठ्या प्रमाणावर वाढली आहे. हे अवजड ट्रक, कंटेनर ढाब्यावर रात्रीच्या वेळी विश्रांतीसाठी थांबून सकाळी पुढील प्रवासासाठी निघून जात असतात.
त्याचबरोबर समाजात फोफावलेली ढाबासंस्कृती आणि चंगळवादामुळे परिसरातील लोकांची विशेषत: तरुणांची रात्री या ठिकाणी गर्दी होत असते. साहजिकच तळीरामांमुळेही या ठिकाणचे वातावरण तणावग्रस्तच असते.
गेल्या कित्येक दिवसांपासून याठिकाणी असलेल्या पोलीस मदत केंद्रास कुलूप लावण्यात आलेले आहे. काही अपवादात्मक परिस्थिती याठिकाणी नाकाबंदी केली जाते. अथवा पोलीस बंदोबस्त ठेवला जातो, मात्र याठिकाणी कायमस्वरुपी पोलीस असणे गरजेचे आहे.
रात्री-अपरात्री अपघात झाल्यास अपघातग्रस्त लोकांना तातडीने मदत मिळणे गरजेचे आहे. त्यामुळे आणि परिसरात छोट्या-मोठ्या चोऱ्यांचे प्रमाणही असल्यामुळे याठिकाणी कायमस्वरूपी कर्मचारी असावेत, अशी मागणी प्रवासी, ट्रकचालक यांच्यामधून व्यक्त होत आहे. (प्रतिनिधी)