फलटण : जिल्हा प्रशासनाकडून सोमवारी जाहीर केलेल्या अहवालानुसार फलटण तालुक्यात चोवीस व्यक्तींच्या कोरोनाचाचण्या पॉझिटिव्ह आल्या आहेत. गेल्या आठ दिवसांत तालुक्यात कोरोना रुग्णांची संख्या वाढू लागली आहे. सोमवारी चोवीस नवे कोरोनाबाधित आढळले. त्यामुळे प्रशासनातून चिंता व्यक्त होऊ लागली आहे.
फलटण तालुक्यात मागील पाच ते सहा महिन्यांपासून कोरोना रुग्णांची संख्या कमी झाली होती. दररोज सरासरी दहाच्या आसपास रुग्ण सापडायचे. राज्यात तसेच सातारा जिल्ह्यात सर्वत्र कोरोना रुग्ण वाढत असताना फलटण तालुक्यात रुग्ण संख्या खूपच कमी होती. नागरिकही निर्धास्त होते. दरम्यान फलटण तालुक्यातील कोरोना रुग्णांच्या संख्येत वाढ होत आहे. त्यामुळे कोरोनाचा धोका वाढलेला आहे. नागरिकांनी मास्क वापरावे व सोशल डिस्टंन्सिंगचे पालन करावे, तसेच शासनाने दिलेल्या नियमांचे पालन करण्याचे आवाहन प्रशासनाकडून करण्यात आले आहे.
फलटण शहरात सोळा कोरोनाबाधित आढळले आहेत. यामध्ये फलटण शहर ११, बुधवार पेठ २, कसबा पेठ १, आनंदनगर १, लक्ष्मीनगर येथील एका व्यक्तीचा अहवाल कोरोनाबाधित आला आहे, तर ग्रामीण भागात आठजण कोरोनाबाधित आले आहेत. यामध्ये वाठार निंबाळकर १, आंदरूड १, सुरवडी १, मिरगाव १, ढवळेवाडी १, पाडेगाव १, तरडगाव १, मलवडी १ व्यक्तींच्या कोविड चाचण्या पॉझिटिव्ह आल्या आहे. तालुक्यात हळूहळू रुग्ण संख्या वाढू लागल्याने नागरिकांनी आता सतर्कता बाळगण्याची गरज निर्माण झाली आहे.