मेढा शाळा पटक्रमवारीत जिल्ह्यात दुसरी

कुडाळ : गतिमान युगातील पिढीच्या सर्जनशील विचार, वैज्ञानिक दृष्टिकोन आणि विविध कौशल्य विकसित करण्यासाठी महाराष्ट्र शासनाने मॉडेल स्कूल ही संकल्पना राबवण्याचे ठरवले आहे. यामध्ये जावळी तालुक्यातील मेढा प्राथमिक शाळेची निवड झाली आहे. जिल्हा परिषद शाळांमध्ये पटसंख्येने जिल्ह्यात दुसऱ्या क्रमांकावर असणारी मेढा शाळा आहे. त्यामुळे आदर्श शाळा म्हणून निवड झाली आहे.

आदर्श शाळा म्हणून शैक्षणिक गुणवत्ता साधण्याकरिता विद्यार्थ्यांच्या मूलभूत कौशल्य विकास साधणे, भाषा, गणित यातील मूलभूत संकल्पना प्राप्त होऊन मुलांमध्ये चिकित्सक विचार करण्याची प्रवृत्ती वाढीस लागणे, नीतिमूल्य रुजवणे आणि त्यांच्यातील संभाषण कौशल्याचा विकास करणे, तसेच शाळेतील दप्तराचे ओझे कमी करून विद्यार्थ्यांच्या कला कौशल्याला चालना देणारे विविध उपक्रम राबविणे. पाठ्यपुस्तकाच्या पलीकडेही जाऊन ज्ञानाची कवाडे त्यांच्याकरिता खुली करण्यात येणार आहेत. आदर्श शाळेच्या या सर्वच निकषांची अंमलबजावणी मेढा शाळेत होत आहे.

सर्वगुणसंपन्न विद्यार्थ्यांना घडविण्यासाठी या सर्वच निकषांमध्ये ही शाळा पात्र ठरली आहे. जावली तालुक्यातच नव्हे तर जिल्ह्यात एक उपक्रमशील असणारी शाळा म्हणून नावलौकिक असलेली ही जिल्हा परिषदेची शाळा आहे.

यासाठी या शाळेतील शिक्षक वृंद मेहनत घेत आहेत. ग्रामीण भागातील या शाळेची सर्वांगीण प्रगती पाहता इतरांना मार्गदर्शन ठरेल, अशा पद्धतीच्या आदर्श शाळेप्रमाणे या शाळेचे कामकाज पाहायला मिळत आहे.

निवडीबद्दल शिक्षणाधिकारी प्रभावती कोळेकर, गटविकास अधिकारी सतीश बुद्धे, गटशिक्षणाधिकारी कल्पना तोडरमल, शिक्षण विस्ताराधिकारी चंद्रकांत कर्णे, केंद्रप्रमुख अलका सपकाळ, शाळा व्यवस्थापन समिती अध्यक्षांनी कौतुक केले आहे.

२०मेढा स्कूल

जावळी तालुक्यातील मेढा येथील याच प्राथमिक शाळेचा मॉडेल स्कूलसाठी समावेश झाला आहे. (छाया : विशाल जमदाडे)