गौणखनिज उत्खनन करणाऱ्यांना ‘महसूल’चा दणका

कऱ्हाड-ढेबेवाडी मार्गावरील मानेगावनजीक मुरुम आणि डबर उत्खनन होत असल्याची माहिती महसूल विभागाला मिळाली. त्यानंतर स्वत: तहसीलदार योगेश्वर टोम्पे आणि त्यांच्या टीमने शनिवारी सकाळी दहा वाजण्याच्या सुमारास त्याठिकाणी भेट देऊन पाहणी केली. यावेळी डबर भरलेला एक डंपर तेथून चालला असतानाच त्याला डबरसह ताब्यात घेण्यात आले. तर उत्खनन होत असलेल्या ठिकाणी अन्य तीन डंपर, एक पोकलॅण्ड, एक ब्लास्टिंग करणारा ट्रॅक्टर अशी पाच वाहने सील करण्यात आली आहेत.

दरम्यान, संबंधित उत्खनन करणाऱ्या व्यक्तीकडे उत्खनन करण्याचा आणि रॉयल्टी भरल्याचा कोणताही वैध पुरावा आढळून आला नाही. त्यामुळे ही कारवाई करण्यात आली असून, संबंधितांकडून खुलासा मागविण्यात आला आहे. त्यानंतर आतापर्यंत किती उत्खनन केले आणि शासकीय नियमानुसार किती रॉयल्टी भरली, याची चौकशी करून त्यानंतर दंडात्मक कारवाई होईल, असे तहसीलदार योगेश्वर टोम्पे यांनी सांगितले. या कारवाईत मंडल अधिकारी प्रवीण शिंदे, तलाठी एस. एस. काशीद, विजय महापुरे आदींनी सहभाग घेतला.

फोटो : २१केआरडी०४

कॅप्शन : मानेगाव, ता. पाटण येथे बेकायदा गौण खनिज उत्खनन केल्याप्रकरणी महसूल विभागाने कारवाई करून वाहने जागीच सील केली आहेत.