"हॅलो, बोला पप्पा...!" वडिलांच्या एका फोनमुळं मुलाचा वाचला जीव, नेमकं काय घडलं?

बसस्थानकातून दुचाकीवरून घरी निघाला होता. नेहमीप्रमाणेच रस्त्यावर वाहतूक सुरू होती. तो सातारा तालुका पोलिस ठाण्यासमोर आला, इतक्यात एका टेम्पोमधून अवजड मशीन खाली उतरवली जात होती. त्याच क्षणी त्याच्या वडिलांचा फोन आला. चालत्या गाडीवर फोन न उचलता यशने दुचाकी रस्त्याच्या कडेला थांबवली आणि फोन घेतला. दोन शब्द बोलतो न बोलतो तोच उभा टेम्पो अचानक त्याच्या समोरच उलटला. क्षणभरात धूळ उडाली, लोकांची आरडाओरड सुरू झाली. काही सेकंदांचा तो विलंब यशच्या आयुष्यात आशेचा किरण घेऊन आला.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

दुचाकीवरून जात असताना कोणी फोनवर बोलत असेल तर पोलिस तातडीने कारवाई करतात. तेव्हा उलट पोलिसांनाच उत्तरे दिली जातात. पण कितीही घाई असली तरी दुचाकी थांबवून फोनवर बोलणे आपल्या हिताचे आहे. अभिजित यादव, सहायक पोलिस निरीक्षक, वाहतूक शाखा, सातारा

जर तो फोनवर बोलतच पुढे गेला असता, तर तोच टेम्पो त्याच्या अंगावर कोसळला असता, याची जाणीव होताच त्याच्या अंगाचा अक्षरशः थरकाप उडाला. थरथरत्या अवस्थेतच तो घरी पोहोचला. त्याने काही मिनिटांपूर्वी घडलेला संपूर्ण प्रसंग आईला सांगितला तेव्हा तिचेही डोळे पाणावले.

मोबाईलमुळे अपघात होतात, हे आपण नेहमी ऐकतो. पण कधी कधी हाच मोबाईल जीवदानही देऊ शकतो, याचा प्रत्यय या घटनेतून आला. मात्र, या प्रसंगाने एक गोष्ट अधोरेखित केली. रस्त्यावर सुरक्षितता सर्वांत महत्त्वाची. यशने घेतलेला क्षणभराचा निर्णय त्याच्यासाठी जीवनदानच ठरला.