हजारमाचीत सरपंच, उपसरपंच निवडीत चुरस

ग्रामपंचायतीच्या कार्यालयात मंगळवारी ही निवडणूक प्रक्रिया झाली. निवडणूक निर्णय अधिकारी म्हणून पंकज हलकंदकर, तर सहायक म्हणून तलाठी एस. जी. मर्ढेकर, सचिव एन. व्ही. चिंचकर यांनी काम पाहिले.

हजारमाची ग्रामपंचायतीच्या सरपंचपदासाठी विद्या मधुकर घबाडे, पिंताबर आबा गुरव, तर उपसरपंचपदासाठी प्रशांत आत्माराम यादव, संगीता रवींद्र डुबल यांनी अर्ज दाखल केले होते. निवडणूक प्रक्रिया झाल्यानंतर अर्जाची छाननी होऊन सर्व अर्ज वैध ठरले. अर्ज कोणीही मागे न घेतल्याने अखेर मतदान घेण्यात आले. त्यामध्ये सरपंचदाच्या निवडणुकीत विद्या घबाडे यांनी ९ मते, तर पितांबर गुरव यांना ८ मते मिळाली. त्याचप्रमाणे उपसरपंचपदाच्या निवडणुकीत प्रशांत यादव यांना ९, तर संगीता डुबल यांना ८ मते मिळाली. त्यानंतर विद्या घबाडे यांना सरपंच, तर प्रशांत यादव यांना उपसरपंच म्हणून निवडणूक निर्णय अधिकारी पंकज हलकंदकर यांनी घोषित केले. त्यानंतर उपस्थित कार्यकर्त्यांनी फटाक्यांची आतषबाजी व गुलालाची उधळण करत जल्लोष केला.

दरम्यान, निवडीनंतर सरपंच विद्या घबाडे व उपसरपंच प्रशांत यादव यांचा निवडणूक निर्णय अधिकारी पंकज हलकंदकर यांच्याहस्ते सत्कार करण्यात आला. सर्वांना बरोबर घेऊन गटतट न मानता हजारमाची गावच्या विकासासाठी विविध योजना, उपक्रमांच्या माध्यमातून प्रयत्न करणार असल्याचे नूतन सरपंच विद्या घबाडे व उपसरपंच प्रशांत यादव यांनी सांगितले.

फोटो : २४केआरडी०१

कॅप्शन : हजारमाची (ता. कऱ्हाड) येथे सरपंचपदी विद्या घबाडे व उपसरपंचपदी प्रशांत यादव यांची निवड झाल्यानंतर पदाधिकाऱ्यांसह कार्यकर्त्यांनी गुलालाची उधळण करून जल्लोष केला.