घाट रस्ता खचून मोरी पूल वाहून गेला

चाफळ : पाटण तालुक्यातील चाफळ विभागाला बुधवारी जोरदार पावसाने झोडपून काढले. या पावसात चाफळमार्गे दाढोली व्हाया पाटण रस्ता दाढोली-महाबळवाडीनजीक खचून मोरीपूल वाहून गेल्याने वाहतूक पूर्णपणे ठप्प झाली आहे. पहिल्याच पावसात रस्ता खचल्याने ‘सर आली धावून रस्ता गेला वाहून’ अशी काहीशी परिस्थिती निर्माण झाली आहे. बांधकाम विभागाने तातडीने रस्त्याची दुरुस्ती करण्याची मागणी विभागातील ग्रामस्थांनी केली आहे.

चाफळ विभागातून दाढोलीमार्गे पाटणला जोडणारा कमी अंतराचा रस्ता आहे. माजी सार्वजनिक बांधकाम मंत्री विक्रमसिंह पाटणकर यांनी बांधकाम मंत्री असताना, डोंगर फोडून हा रस्ता तयार केला होता. संपूर्ण घाट रस्ता असणाऱ्या या रस्त्यावर जागोजागी वेडीवाकडी वळणे आहेत. सुमारे दीड वर्षांपूर्वी या रस्त्याची तात्पुरती मलमपट्टी केली होती. ठिकठिकाणी सिमेंटच्या जलवाहिन्या वापरुन मोऱ्यांची कामे करण्यात आली होती. यातील महाबळवाडीजवळील भैरकाटा नावाच्या शिवाराजवळील घाट रस्त्याच्या दुसऱ्या वळणावरील रस्ता खचून मोरीपुलासह जलवाहिन्या वाहून गेल्या आहेत. त्यामुळे शासनाचा लाखो रुपयांचा निधी निकृष्ट दर्जाचे काम व मर्जीतील ठेकेदारांना कामे दिली गेल्यानेच पाण्यात गेल्याची संतप्त प्रतिक्रिया येथील ग्रामस्थ व्यक्त करत आहेत. दरवर्षी या रस्त्याची दुरवस्था होते.

या संपूर्ण घाट रस्त्याच्या दोन्ही बाजूला नाले काढणे गरजेचे आहे. तसेच ठिकठिकाणी संरक्षक कठड्यांसह आवश्यक त्या ठिकाणी चांगल्या पध्दतीचे मजबूत फरशी पूल बांधणे गरजेचे आहे. दरवर्षी पावसाळ्यात होणारी या रस्त्याची दुरवस्था थांबविण्यासाठी प्रामाणिक प्रयत्न केल्यास निश्चितच ग्रामस्थांची परवड कायमस्वरूपी थांबण्यास मदत होणार आहे. सध्या रस्त्यावर ठिकठिकाणी पावसाचे पाणी वाहिल्याने रस्ता जागोजागी उखडला आहे. भैरकडा येथील मोरीपूल वाहून गेल्याने रस्ता खचला आहे. त्यामुळे या रस्त्यावरील वाहतूक पूर्णपणे बंद झाली आहे.

चौकट :

सुरक्षेसाठी प्रवास टाळावा

दाढोली महाबळवाडीनजीक भैरकडा येथे बुधवारच्या पावसात रस्ता खचून मोरीपूल वाहून गेला आहे. ठिकठिकाणी रस्ता उखडल्याने मोठी दुरवस्था झाली आहे. बांधकाम विभागाने तातडीने रस्त्याची दुरुस्ती करावी. रस्ता खचल्याने वाहतूक पूर्णपणे बंद झाल्याने विभागातील ग्रामस्थ, वाहनचालक यांनी या मार्गावरुन ये-जा करू नये, असे आवाहन दाढोलीचे पोलीसपाटील सचिन डांगे व माजी सरपंच प्रकाश पवार यांनी केले आहे.