रहिमतपुरात सहायक पोलीस निरीक्षकपदी गणेश कड

रहिमतपूरचे तत्कालीन सहायक पोलीस निरीक्षक घनश्याम बल्लाळ यांची पदोन्नती होऊन ते तत्काळ मुंबईला रवाना झाले. त्यामुळे रिक्त झालेल्या जागेवर कारभारी कधी येणार, कोण येणार, याकडे सगळ्यांच्या नजरा लागल्या होत्या. रहिमतपूर पोलीस ठाण्यात लवकर नवीन अधिकारी पाठविला जात नसल्याने ‘लोकमत’ने रहिमतपूर पोलीस ठाण्याला प्रतीक्षा कारभाऱ्यांची’ या आशयाचे वृत्त प्रसिद्ध केले होते. वृत्त प्रसिद्ध होताच पाच दिवसांतच रहिमतपूर पोलीस ठाण्याला नवा कारभारी मिळाला.

रहिमतपूर पोलीस ठाणे मिळावे, यासाठी सुमारे १० अधिकारी रेसमध्ये होते.

कऱ्हाड तालुका पोलीस ठाण्यात कार्यरत असलेले तत्कालीन अधिकारी गणेश कड यांनी या रेसमध्ये बाजी मारली. तब्बल १८ दिवस रिक्त असलेल्या रहिमतपूर पोलीस ठाण्याची सूत्रे रविवारी सकाळी ११ वाजण्याच्या सुमारास सहायक पोलीस निरीक्षक गणेश कड यांनी स्वीकारली. रहिमतपूर पोलीस ठाण्याच्या कार्यक्षेत्रात अपवाद वगळता नेहमी शांतता असते. तरीही कायदा व सुव्यवस्था अबाधित ठेवण्यासाठी बेकायदा व्यावसायिकांवर अंकुश ठेवण्याचे काम कड यांना नियोजनबद्धपणे करावे लागणार आहे.

फोटो : गणेश कड