बिनविरोधचा डंका; पण दुरंगीचाही दणका!

पाटण : तालुक्यातील १०७ ग्रामपंचायतींच्या निवडणुका जाहीर झाल्या. त्यातच अनेक गावांनी ग्रामपंचायत बिनविरोध करून एक वेगळा आदर्श घालून दिला आहे. मात्र, काही गावांमध्ये अटीतटीचा संघर्ष होणार, हे निश्चित आहे.

दरम्यान, मोठ्या गावांमध्ये ग्रामपंचायत निवडणूक बिनविरोध करण्याचे प्रयत्न असफल झाले आहेत. कारण एका वॉर्डातील मिटले तर दुसऱ्या वॉर्डमध्ये पेटतय, अशी परिस्थिती आहे. त्यामुळे अनेक गावांमध्ये निवडणूक होणारच हे स्पष्ट झाले आहे.

उमेदवारी अर्जांच्या माघारीनंतर स्पष्ट झालेल्या स्थितीनुसार पाटण तालुक्यात मंत्री शंभूराज देसाई विरुद्ध माजी मंत्री विक्रमसिंह पाटणकर यांच्या दोन गटात मुख्य लढत होणार, हे स्पष्ट दिसत आहे. त्यामध्ये कोयना विभागातील नानेल, नेचल, मेंढेघर, हुबरळी, कामरगाव या गावांमध्ये अटीतटीच्या लढती होतील, अशी चिन्हे आहेत. मोरणा विभागातील अनेक गावांनी बिनविरोध ग्रामपंचायत करून एक आदर्श समोर ठेवला आहे. मात्र, कोकिसरे, वाडीकोतावडे, धावडे, काहीर, पेठशिवापूर, गोकुळ तर्फ पाटण या गावांनी बिनविरोधचे नावही घेतले नाही.

तारळे विभागातही देसाई आणि पाटणकर गटात अटीतटीच्या लढती होतील, असे दिसत आहे. यामध्ये सर्वात मोठे गाव तारळे असून येथे सतरा जागांसाठी ५३ जणांनी उमेदवारी अर्ज भरले. तसेच या विभागातील मुरुड, मालोशी, बांबवडे, आंबळे, दुसाळे या गावांमध्ये जोरदार लढत होण्याची चिन्हे आहेत. ढेबेवाडी विभागातील मानेवाडी, खळे, कुंभारगाव, चिखलेवाडी, करपेवाडी, काळगाव, मोरेवाडी, कुठरे आदी गावांमध्ये जोरदार लढती होणार आहेत. मात्र, याच विभागातील पाळशी, तामिणे, सळवे, सातर या गावांनी बिनविरोधचा आदर्श निर्माण केला आहे. कुंभारगाव येथे ११ जागांसाठी लक्षवेधी लढती होणार आहेत. हे गाव माजी मुख्यमंत्री पृथ्वीराज चव्हाण यांचे आहे.

चाफोली विभागातील बोंद्री, कातवडी, चिटेघर येथेही संघर्ष होणार आहे. चाफळ विभागात केळोली येथे अटीतटीची लढत आहे. इतर ग्रामपंचायतींमध्ये मात्र अंशत: निवडणुका होणार असे दिसते. मणदुरे विभागातील मणदुरे, मेंढोशी, साखरी, दिवशी खुर्द या गावांमध्ये मोठ्या निवडणुका अपेक्षित आहेत.

मल्हारपेठ विभागातील बोडकेवाडी, ठोमसे, नाडोली येथे मोठ्या लढती होणार असे दिसते. मरळी विभागातील शिंदेवाडी, सुळेवाडी, चोपदारवाडी, सोनावडे, त्रिपुडी, चोपडी, पापर्डे, सांगवड आदी ठिकाणी धुमशान होणार आहे.

- चौकट

... या ग्रामपंचायती झाल्या बिनविरोध

उमेदवारी अर्जांची छाननी झाल्यानंतर तालुक्यातील अनेक ग्रामपंचायतींमध्ये जेवढ्या जागा तेवढेच उमेदवार शिल्लक राहिल्यामुळे अर्ज माघारी घेण्यापूर्वीच काही गावांनी बिनविरोधचा आदर्श निर्माण केला. त्यामध्ये गोषटवाडी, आंबेघर तर्फ मरळी, पाचगणी, आटोली, नेरले, डांगीस्टेवाडी, सुरुल, खोणोली, वाघजाईवाडी, अंब्रुळे, कोदळ, दिवशी बुद्रुक, जरेवाडी, चाफोली, तामिणे, पाळशी, सळवे, कोळेकरवाडी, सातर, पाचपुतेवाडी, चव्हाणवाडी, मस्करवाडी या ग्रामपंचायती बिनविरोध झाल्यात जमा आहेत.