महापारेषण कंपनीत साडेचार हजार पदे भरण्याचा मार्ग मोकळा

कोपर्डे हवेली : महाराष्ट्र राज्य विद्युत मंडळाच्या विभाजनानंतर तयार झालेल्या महापारेषण कंपनीत वर्ग एक व वर्ग चार प्रवर्गातील आकृतीबंध पदोन्नतीमध्ये तयार झालेला असमतोल दूर करण्यासाठी महाराष्ट्र स्टेट इलेक्ट्रीसिटी वर्कर फेडरेशन संघटनेच्यावतीने २००७पासून सतत पाठपुरावा करण्यात आला होता. त्याला अखेर यश येऊन महापारेषणमधील रिक्त साडेचार हजार पदे भरण्याचा मार्ग मोकळा झाला आहे.

२०१७मध्ये सुधारित आकृतीबंध लागू करण्याची प्रक्रिया सुरू झाली. मात्र, काही कारणांमुळे त्याला काहींनी विरोध केला होता. त्यामुळे ही प्रक्रिया रखडली. ही प्रक्रिया सुरू होण्यासाठी महाराष्ट्र स्टेट इलेक्ट्रीसिटी वर्कर फेडरेशन संघटनेने मुंबई येथे आंदोलन केले. त्यावेळी ऊर्जा सचिव, कंपनीचे संचालक व संघटनेचे नेते यांच्यात बैठक होऊन एप्रिल महिन्यात सुधारित प्रस्ताव तयार करण्यात आला. मे महिन्यात कंपनीचे अध्यक्ष नितीन राऊत यांनी तयार केलेल्या आकृतीबंधाला मान्यता दिली. मंगळवार, दि. १५ जून रोजी प्रशासकीय पत्रानुसार साडेचार हजार तंत्रज्ञान नेमणूक वर्ग चारच्या पदोन्नतीचा मार्ग मोकळा झाला आहे. लवकरच भरती प्रक्रिया सुरू होणार आहे.

यासाठी ऊर्जामंत्री नितीन राऊत, महापारेषण कंपनीचे सुमीत गमरे, ऊर्जा सचिव दिनेश वाघमारे यांच्याकडे सतत पाठपुरावा संघटनेचे अध्यक्ष काॅ. मोहन शर्मा, कार्याध्यक्ष सी. एन. देशमुख, सरचिटणीस कृष्णा भोयर, महेश जोतराव, भीमाशंकर पोहेकर आदींनी केला.

कोट

संघटनेच्या माध्यमातून भरतीसाठी सतत नेत्यांनी संबंधित विभागाकडे प्रयत्न केला, त्याचे हे यश आहे. लवकरच भरती सुरू होईल.

- नानासाहेब सोनवलकर