पाटण तालुक्यातील घोट सोसायटीचे दोन्ही ठराव अपात्र

सातारा : जिल्हा मध्यवर्ती बँकेच्या निवडणुकीसाठी पाटण तालुक्यातील घोट विकास सेवा सोसायटीतून दोन ठराव आल्याने ते दोन्ही ठराव विभागीय सहनिबंधक यांनी रद्द ठरवले आहेत. तसेच दाखल झालेल्या ४६ हरकतींपैकी १४ हरकती फेटाळून लावल्या आहेत.

जिल्हा बॅंकेच्या निवडणुकीसाठी मतदारयादी अंतिम करण्याची प्रक्रिया सुरू आहे. यामध्ये १९६३ मतदारांची कच्ची यादी जिल्हा बॅंकेने तयार करून ती सहनिबंधक कार्यालयास पाठवली होती. ही यादी प्रसिद्ध करून त्यावर आक्षेप व हरकती मागविल्या होत्या. कच्च्या यादीवर ४६ हरकती दाखल झाल्या होत्या. यामध्ये सर्वांचे लक्ष वेधले, ते पाणीपुरवठा संस्थेतील खासदार रणजितसिंह नाईक- निंबाळकर व आमदार जयकुमार गोरे यांच्या नावाचे ठराव जिल्हा बॅंकेने अपात्र यादीत टाकले होते. त्यावर त्यांनी आक्षेप घेतला होता. सहनिबंधकांनी हे दोन्ही ठराव पात्र ठरवत मतदारयादीत समाविष्ट केले आहेत.

दरम्यान, बुधवारी दाखल झालेल्या हरकतींबाबत विभागीय सहनिबंधक निकाल जाहीर करणार होते. त्यानुसार आमदार जयकुमार गोरे आणि खासदार रणजितसिंह नाईक-निंबाळकर यांचे पाणीपुरवठा मतदारसंघांमधील केलेले ठराव मान्य करून त्यांची नावे मतदार यादीमध्ये वाढवण्यात आली आहेत. या मतदार यादीतून नाव वगळण्याचा किंवा वाढवण्याचा अधिकार निवडणूक आयोगाला आहे. बँकेने अधिकार नसताना गोरे व निंबाळकर या दोघांची नावे वगळली होती, याबाबत घेतलेली हरकत विभागीय सहनिबंधक यांनी मान्य केली आहे.

पाटण तालुक्यातील घोट विकास सेवा सोसायटीमधून मधुकर बंडू आरेकर आणि लक्ष्मण किसन बोरगे या दोघांचे ठराव संचालकांच्या सहीने तयार झाले होते. हे दोन्ही ठराव दुबार असल्याने ते विभागीय सहनिबंधक यांनी रद्द केले. या दोघांची नावे मतदार यादीतून वगळण्यात आली. तसेच कऱ्हाड तालुक्यातील प्रियदर्शनी विकास सेवा सोसायटीमधील दुबार ठरावापैकी एक ठराव कायम ठेवण्यात आला आहे.

माढा लोकसभा मतदारसंघाचे खासदार रणजितसिंह नाईक-निंबाळकर यांनी श्री संत सावतामाळी पाणीपुरवठा संस्था, माण व माण खटाव विधानसभा मतदारसंघाचे आमदार जयकुमार गोरे यांनी गोरखनाथ सहकारी पाणीपुरवठा संस्था, वरकुटे-मलवडी येथून ठराव दाखल केला होता. यांचे जिल्हा मध्यवर्ती बँकेसाठी करण्यात आलेले ठराव पात्र ठरविण्याचा निर्णय विभागीय सहनिबंधक यांनी घेतला.

कच्च्या मतदार यादीत खासदार रणजितसिंह नाईक-निंबाळकर व आमदार जयकुमार गोरे यांचे पाणी पुरवठा मतदारसंघातील ठराव जिल्हा बँकेने अपात्र यादीत टाकले होते. त्यावरून या दोघांनी विभागीय सहनिबंधकांकडे हरकत दाखल केली होती. तसेच विभागीय सहनिबंधक यांच्या निकालानंतर उच्च न्यायालयात जाण्याचा इशारा आमदार जयकुमार गोरे यांनी दिला होता. दरम्यान, यादीतील नावे अपात्र ठरल्यानंतर सुनावणीवेळी दोघांनीही हरकती नोंदवल्या होत्या. त्यावर सुनावणी होऊन मंगळवारी विभागीय सहनिबंधकांनी या दोघांचेही ठराव पात्र ठरविले.

२७ सप्टेंबर रोजी अंतिम मतदार यादी

विभागीय सहनिबंधक यांनी दाखल झालेल्या ४६ हरकतींपैकी १४ फेटाळल्या; मात्र ३२ हरकती मान्य केल्या आहेत. जिल्हा मध्यवर्ती बँकेने १९६३ इतक्या मतदारांची यादी विभागीय सहनिबंधकांकडे सादर केली होती. यामधील दोन मतदार संख्या वाढणार असून, एक मतदार संख्या कमी होणार आहे. त्यामुळे १९६४ मतदारांची अंतिम यादी आता २७ सप्टेंबर रोजी जाहीर केली जाणार आहे.