फलटणमध्ये कलिंगड कापून साजरा होतोय वाढदिवस

फलटण : केक कापून वाढदिवस साजरा करणे ही तशी पाश्चिमात्य संस्कृती. हल्ली ही संस्कृती आपल्याकडेही रुजू लागलीय. मात्र, फलटण तालुका आता याला अपवाद ठरू लागला आहे. शेतकऱ्यांच्या कृषी मालाला बाजारपेठ उपलब्ध व्हावी, यासाठी आता केकऐवजी कलिंगड कापून व भेट देऊन वाढदिवस साजरा केला जात आहे.

केक कापून वाढदिवस साजरा करणे ही पाश्चात्य संस्कृती आपण स्वीकारली आहे. त्यामुळे केकसह अन्य वस्तूंच्या किमतीही झपाट्याने वाढल्या आहेत. आजची तरूणाई तर या संस्कृतीमध्ये पूर्ण वाहत गेली आहे. वाढदिवस घरी साजरा करण्याऐवजी आता हॉटेल, मोकळी मैदाने, पर्यटनस्थळी साजरा करण्याकडे कल वाढत चालला असून, पैशांची उधळपट्टीही मोठ्या प्रमाणात केली जाते. या सर्वांना बगल देत हंगामी फळांचा वापर करून वाढदिवस साजरा करण्याची नवी संस्कृती आता फलटण तालुक्यात रुजू पाहत आहे.

सध्या शेतकऱ्यांनी मोठ्या कष्टाने पिकविलेली कलिंगडे बाजारात विक्रीसाठी दाखल झाली आहेत. शेतकऱ्यांच्या मालाला चांगला भाव मिळावा, त्यांच्या उत्पादनांची मागणी वाढावी यासाठी फलटण तालुक्यात कलिंगड कापून वाढदिवस साजरा केला जात आहे. आसू येथील नानासाहेब जाधव यांनी स्वत: आपला वाढदिवस कलिंगड कापून आणि इतरांना कलिंगड भेट देऊन साजरा केला. तसेच आपल्या प्रियजनांनादेखील कलिंगडे खाऊ घातली.

(कोट)

केक कापून वाढदिवस साजरा करणे, अवाढव्य खर्च करणे बरोबर नाही. त्यामुळेच मी कलिंगड कापून वाढदिवस साजरा केला. शेतकऱ्यांच्या कृषी मालाला चांगला भाव मिळावा, त्याची मागणी वाढावी हाच या मागचा उद्देश आहे.

- नानासाहेब जाधव, आसू (फलटण)

फोटो : २१ फलटण ०१/०२

फलटण तालुक्यात कलिंगड कापून वाढदिवस साजरा करण्याची नवीन संस्कृती रुजू लागली आहे. नुकताच आसू येथील नानासाहेब जाधव यांनी कलिंगड कापून वाढदिवस साजरा केला.