बाळ आयसीयूत, आईची घालमेल थांबवली...

सातारा : जिल्हा शासकीय रुग्णालयातील शिशू वाॅर्डमध्ये भंडाराच्या घटनेनंतर बाळांच्या आईच्या मनात थोडी रुखरुख होती. मात्र, परिचारिकेंनी माता बनून बाळाची घेतलेली काळजी आईंना निर्धास्त करण्यास कारणीभूत ठरतेय.

भंडारा येथील घटनेनंतर जिल्हा रुग्णालयातील शिशू वाॅर्डमध्ये काय परिस्थिती आहे, याची माहिती घेतली असता अनेक चांगल्या बाबी समोर आल्या. प्रसूतीनंतर काही मातांच्या बाळांना आयसीयूमध्ये ठेवण्यात आले आहे. या बाळांची रात्रंदिवस परिचारिका काळजी घेत आहेत. एखादं बाळ रडलं तरी पटकन त्या बाळाला आईचं दूध पाजलं जात. आईंना तुम्ही निर्धास्त राहावा, इथे जोपर्यंत मुले आहेत. तोपर्यंत ही मुले आमचीच आहेत, असा विश्वास सर्वच आईंना देण्यात आलाय. त्यामुळे भंडारा येथील घटना आईंच्या मनाला शिवतही नाही. बाळाला कसे सांभाळायचे इथंपासून ते मोठे होईपर्यंत त्याचे संगोपन कसे करायचे, याची इत्यंभूत माहिती परिचारिका देत असतात. त्यामुळे बाळांच्या आई अगदी निर्धास्त असतात. रात्री ड्युटीवर असलेल्या परिचारिका अत्यंत सावध असतात. बाळाचा थोडा आवाज झाला तरी त्या धावून जातात. गरज पडली तरच आईंना झोपेतून उठवतात. त्यांना पुरेशी विश्रांती मिळण्यासाठी सर्व परिचारिका आणि डाॅक्टरही प्रयत्नशील असतात. एकाही मातांनी इथली तक्रार केली नाही. उलट सर्व माता भरभरून बोलत होत्या. या परिचारिका आमच्या बाळाच्या माता बनल्या, हे पाहून आम्ही गहिवरून जातोय, असे प्रसूती झालेल्या मातांनी ‘लोकमत’शी बोलताना सांगितले.

सहा दिवसांपूर्वी बाळाला धाप लागत होती. परंतु, आता बाळाची प्रकृती सुधारतेय. परिचारिकेंनी अत्यंत चांगली काळजी घेतली. आम्हाला बाळाची कशी काळजी घ्यायची, हे त्यांनी शिकवले.

-शैला जाधव, नुने, ता. सातारा

गत चाैदा दिवसांपासून माझं बाळ इथं उपचार घेतंय. अत्यंत योग्य काळजी घेतली जात आहे. रात्रीचं बाळ रडलं तर आम्हाला झोपेतून उठवून दूध पाजण्यास सांगतात.

-धनश्री सावंत, गोगावले, ता. कोरेगाव

पाच दिवसांपासून माझं बाळ इथं आहे. त्याला ताप येत होता. त्यामुळे त्याला काचेमध्ये ठेवलंय. परिचारिका काळजी घेतात. त्यामुळे मी निर्धास्त असते.

-श्रीदेवी सलगोंड, उबराणी, विजापूर

शिशू वाॅर्डमध्ये बाळांवर उपचारांसाठी अत्याधुनिक मशीन आहेत. परिचारिका रात्रंदिवस सतर्क असतात. मातांना कसलीही काळजी लागणार नाही, अस बाळांचं संगोपन शासकीय रुग्णालयात केले जातंय.

- डाॅ. सुभाष चव्हाण, जिल्हा शल्यचिकित्सक, सातारा