सातारा : गेल्या आठवड्यात गुरुवार बागेजवळ इमारतीवरून पडून कामगाराचा मृत्यू झाल्याची घटना ताजी असतानाच शुक्रवारी साताऱ्यात आणखी एका कामगाराचा इमारतीवरून पडून मृत्यू झाल्याची खळबळजनक घटना घडली.नारायण नरोत्तम धुर्वे (वय ३९, मूळ रा. छत्तीसगड, सध्या रा. विलासपूर, सातारा) असे इमारतीवरून पडून मृत्यू झालेल्या कामगाराचे नाव आहे. याबाबत अधिक माहिती अशी, गेल्या काही दिवसांपासून सदर बझार येथील कुपर कॉलनीमध्ये एका इमारतीचे बांधकाम सुरू आहे.
या बांधकामावर नारायण धुर्वे हे काम करत होते. शुक्रवारी दुपारी काम करत असताना अचानक त्यांचा तोल गेला. ते खाली पडल्यानंतर त्यांच्या डोक्याला आणि मानेला गंभीर जखम झाली. हा प्रकार घडल्यानंतर इतर कामगारांनी त्यांना तत्काळ जिल्हा शासकीय रुग्णालयात दाखल केले. मात्र, उपचारापूर्वीच त्यांचा मृत्यू झाला.दरम्यान, अशाच प्रकारची घटना गेल्या आठवड्यात साताºयातील गुरुवार बागेजवळही घडली होती. इमारतीवर काम करत असताना तोल जाऊन रवी भिकू चव्हाण (वय ३२, रा. शाहूपुरी सातारा) या कामगाराचा मृत्यू झाला होता. त्यानंतर आता दुसऱ्यांदा ही घटना घडल्याने कामगारांमध्ये अस्वस्थता पसरली आहे.