सातारा : सातारा नगरपालिकेच्या सर्वोच्च पदासाठी निवडणुकीच्या रिंगणात उतरलेल्या नऊ मातब्बर उमेदवार शुक्रवारी (दि. २८) एकाच व्यासपीठावर आले होते. यावेळी ‘जनता दरबारात’ झालेल्या प्रश्नांच्या सरबतीने त्यांची पुरती दमछाक झाली. शहराच्या विकासाचे व्हिजन मांडताना हेच भावी नगराध्यक्ष साताऱ्याच्या भौगोलिक क्षेत्राशी संबंधित अत्यंत मूलभूत प्रश्नांची उत्तरे देताना ‘गडबडून' गेले.बालाजी चॅरिटेबल ट्रस्टचे संस्थापक राजेंद्र चोरगे यांनी अमेरिकेतील ‘प्रेसिडेंशियल डिबेट’च्या धर्तीवर ‘साता-याचे व्हिजन’ या विषयांवर भावी नगराध्यक्षांना एकाच व्यासपीठावर निमंत्रित केले होते. यावेळी शहरातील सामाजिक, औद्योगिक, राजकीय व सांस्कृतिक क्षेत्रातील मान्यवरमंडळी उपस्थित होती.सुरवातीला चोरगे यांनी सातारा शहराच्या भौगोलिक क्षेत्रफळापासून ते लोकसंख्येपर्यंत काही मूलभूत प्रश्न उपस्थित केले. परंतु, भावी नगराध्यक्षांना त्याची उत्तरे देता आली नाहीत. त्यानंतर भावी नगराध्यक्ष होण्यासाठी इच्छुक नऊ उमेदवारांनी शहर विकासाचे व्हिजन विषयीची संकल्पना मांडली. दीपक प्रभावळकर व चित्रा भिसे यांनी या कार्यक्रमाचे सूत्रसंचालन केले.या परिसंवादात भाजपचे नगराध्यक्षपदाचे उमेदवार अमोल मोहिते, महाविकास आघाडीच्या उमेदवार सुवर्णा पाटील, अपक्ष उमेदवार शरद काटकर, सुधीर विसापुरे, सनी काटे, अभिजित बिचुकले, रवींद्र भनगे, गणेश भिसे, सागर भिसे यांनी सहभाग घेतला.
ते आठ प्रश्न अन् न देता आलेली उत्तरे...
- सातारा शहराचे क्षेत्रफळ किती आहे - २६.५५ चौरस किलोमीटर
- सातारा शहरातील एकूण रस्ते किती किलोमीटरचे आहेत - ३२० किलोमीटर
- सातारा शहरात पाण्याच्या टाकी किती आहेत - १८
- सातारा शहराला रोज किती पाणी लागते - ३० एमएलडी
- सातारा शहरात कागदावर असलेली स्वच्छतागृह किती - ६०
- सातारा शहरात रोज किती टन कचरा निर्माण होतो - ६० टन
- साताऱ्यामध्ये पार्किंग सुविधा किती ठिकाणी आहे - २ ते ३
- सातारा शहराची लोकसंख्या किती - १ लाख ८० हजार
स्टॅम्पवर लेखी हमी...
- प्रश्न-उत्तरांच्या सामन्यात उमेदवार कमी पडले असले तरी, त्यांनी आपले व्हिजन प्रभावीपणे मांडले. यामध्ये एमआयडीसी विकास, अतिक्रमणमुक्त शहर, पोवई नाका पदपथ, किल्ले अजिंक्यतारा, ऐतिहासिक तळ्यांचे सुशोभीकरण, हॉकर्स झोन आणि रोजगार निर्मिती, महिला सुरक्षा, झोपडपट्टी विकास, आरोग्य केंद्र, सीसीटीव्ही, भ्रष्टाचारमुक्त पारदर्शी कारभार यांसारख्या मुद्द्यांना त्यांनी प्राधान्य देण्याचे आश्वासन दिले.
- यावेळी सर्वांत महत्त्वाचा मुद्दा ठरला, तो म्हणजे उमेदवारांनी दिलेले प्रतिज्ञापत्र. जनतेशी बांधील राहून काम करण्याची आणि दिलेले वचन पाळण्यात अपयशी ठरल्यास नैतिकदृष्ट्या पुन्हा निवडणुकीला सामोरे जाणार नाही, अशी हमी त्यांनी स्टॅम्प पेपरवर लिहून दिली.
Web Summary : Satara's mayoral candidates gathered for a public forum, facing tough questions about the city's issues. While outlining their visions, some struggled with basic geographical and infrastructural details. Promises included development, transparency and accountability, even signing pledges to ensure commitment and potential resignation if promises are broken.
Web Summary : सतारा के महापौर पद के उम्मीदवार एक मंच पर एकत्रित हुए, जहाँ शहर के मुद्दों पर उनसे कठिन प्रश्न पूछे गए। अपनी योजनाओं को रेखांकित करते हुए, कुछ बुनियादी भौगोलिक और बुनियादी ढाँचे के विवरणों से जूझते दिखे। विकास, पारदर्शिता और जवाबदेही के वादे किए गए, यहां तक कि प्रतिबद्धता सुनिश्चित करने के लिए शपथ भी ली गई और वादा टूटने पर इस्तीफे की संभावना जताई गई।