पर्यटनस्थळी पर्यटक आढळल्यास कारवाई होणार..!

पाचगणी : जिल्हाधिकाऱ्यांच्या आदेशानुसार पाचगणी या पर्यटनस्थळावर पर्यटकांना पर्यटनासाठी बंदी करण्यात आली असून, शनिवार व रविवारी संचारबंदी लागू करण्यात आली आहे. कलम १४४ नुसार शनिवार व रविवार तसेच हॉटेल, लॉजिंग व बंगलोधारकांना व्यवसाय करण्यास बंदी घालण्यात आली आहे. बंदीदरम्यान व्यवसाय करताना कोणी सापडल्यास त्यांच्यावर कायदेशीर कारवाई करण्यात येणार असल्याचा इशारा पाचगणी गिरिस्थान नगरपालिकेचे मुख्याधिकारी गिरीश दापकेकर यांनी प्रसिद्धीपत्रकाद्वारे दिला आहे.

याबाबत त्यांनी काढलेल्या पत्रकात पुढे म्हटले आहे की, सातारा जिल्ह्यातील कोविड-१९ चा वाढता प्रादुर्भाव विचारात घेता जिल्हाधिकाऱ्यांनी संचारबंदी लागू केलेली आहे. तरी सर्व पर्यटकांना व पाचगणी आणि लगतच्या ग्रामीण परिसरातील सर्व हॉटेल, लॉज व्यावसायिकांना आवाहन करण्यात येते की, शासनाने कोविड-१९ अंतर्गत पर्यटनस्थळ बंद ठेवण्याबाबत आदेश दिले असून, संचारबंदी लागू केलेली आहे. तरी पर्यटकांनी शनिवार व रविवार या दिवशी पाचगणी आणि लगतच्या ग्रामीण परिसरात पर्यटनासाठी येऊ नये. तसेच पर्यटकांसाठी सर्व हॉटेल, लॉज, बंगलोधारकांना लॉजिंग-बोर्डिंग व्यवसाय करता येणार नाही.

अशा प्रकारचे कोणतेही स्वरूपाचे व्यवसाय सुरू असल्याचे निदर्शनास आल्यास संबंधितांवर आपत्ती व्यवस्थापन कायदा २००५ अन्वये कायदेशीर कारवाई करण्यात येईल याची नोंद घ्यावी, असे आवाहन शेवटी पाचगणीचे मुख्याधिकारी गिरीश दापकेकर यांनी दिलेल्या पत्रकात म्हटले आहे.