जिल्ह्यात कोरोनाचे नवे २५२ रुग्ण
By लोकमत न्यूज नेटवर्क | Published: September 23, 2021 04:45 AM2021-09-23T04:45:31+5:302021-09-23T04:45:31+5:30
सातारा : जिल्ह्यात कोरोनाची रुग्णसंख्या कधी कमी होतेय तर कधी वाढतेय. बुधवारी २५२ जण कोरोना बाधित आढळून आले तर, ...
सातारा : जिल्ह्यात कोरोनाची रुग्णसंख्या कधी कमी होतेय तर कधी वाढतेय. बुधवारी २५२ जण कोरोना बाधित आढळून आले तर, एका बाधिताचा मृत्यू झाला. त्याचबरोबर दिवसभरात २४४ जण कोरोनातून मुक्त झाल्याने त्यांना घरी सोडण्यात आले आहे.
जिल्ह्यात कोरोनाची रुग्णसंख्या दोनशेच्या खाली येत नाही. उलट अधूनमधून रुग्ण वाढतच आहेत. नुकताच गणेशोत्सव पार पडला. यावेळी खरेदीच्या निमित्ताने लोक घराबाहेर पडले होते. त्यामुळे येत्या काही दिवसांत रुग्णसंख्या वाढेल की काय, याची धास्ती आरोग्य विभागाला लागली आहे. बुधवारी आलेल्या अहवालामध्ये बाधितांची संख्या तालुकानिहाय पुढीलप्रमाणे: जावळी १०, कऱ्हाड २८, खंडाळा, ४, खटाव ४५, कोरगाव ११, माण २०, महाबळेश्वर ०, पाटण १, फलटण ६५, सातारा ५८, वाई ७ व इतर ३ अशा २५२ जणांचा त्यामध्ये समावेश आहे. तसेच खटाव तालुक्यातील एका कोरोना बाधिताचा मृत्यू झाला. जिल्ह्यातील विविध कोरोना सेंटरमधून २४४ जणांना घरी सोडण्यात आले.
जिल्ह्यात आतापर्यंत २ लाख १७ हजार ३ जण कोरोनाबाधित आढळून आले असून, ६ हजार ६१ जणांचा कोरोनाने बळी घेतला आहे. तसेच आतापर्यंत २ लाख ३७ हजार २४८ जणांनी कोरोनावर यशस्वी मात केली आहे. सध्या विविध ठिकाणी ६ हजार ६२९ बाधितांवर उपचार सुरू आहेत.