दोन अल्पवयीन मुलांकडून चोरीच्या १३ सायकली जप्त

सातारा : शहरामध्ये सायकलचोरी करणाऱ्या दोन अल्पवयीन मुलांना स्थानिक गुन्हे शाखेच्या पथकाने ताब्यात घेतले असून त्यांच्याकडून सुमारे दीड लाख रुपये किमतीच्या १३ सायकली जप्त करण्यात आल्या आहेत.

याबाबत माहिती अशी, दिनांक १५ ऑक्टोबर २०२० रोजी दुपारी १ ते ३ च्या दरम्यान गणेश भगवान तळेकर (रा. विलासपूर गोडोली) यांच्या राहत्या घरासमोर लावलेली त्यांची गिअरची आठ हजारांची सायकल चोरीस गेली होती. याबाबत त्यांनी शहर पोलीस ठाण्यात फिर्याद दाखल केली होती. शहरात सायकली चोरीस जाण्याचे प्रमाण वाढत असल्याने पोलीस अधीक्षक अजय कुमार बन्सल यांच्या सूचनेनुसार एलसीबीमध्ये सायकल चोरट्यांचा छडा लावण्यासाठी विशेष पथकाची स्थापना झाली होती. या पथकाने सायकलचोरीबाबत तपास सुरू केला असतानाच दि. २० रोजी पाडळी, ता. सातारा येथील एका व्यक्तीने साथीदारांसह गोडोलीत चोरलेली सायकल व सातारा शहरातून आणखी काही सायकला चोरलेल्या असून त्या गावातील लोकांना विकल्या आहेत, अशी खबर एलसीबीला मिळाली.

याबाबत खात्री करून कारवाई करण्यासाठी एलसीबीच्या पथकाने पाडळी, ता. सातारा येथे जाऊन संबंधित मुलास ताब्यात घेऊन तपास केला असता, तो विधी संघर्षग्रस्त बालक असून तो व त्याचे इतर दोन साथीदार यांनी गेल्या वर्षामध्ये सातारा शहरातील वेगवेगळ्या ठिकाणांहून सायकली चोरल्या असल्याचे सांगितले. त्यानंतर, पोलिसांनी त्यांना ताब्यात घेऊन त्यांच्याकडून

एकूण १३ सायकली जप्त केल्या.

दोन विधी संघर्षग्रस्त मुलांना गुन्ह्याच्या तपासकामी पोलिसांनी ताब्यात घेतल्यानंतर बाल न्याय मंडळ सातारा यांच्यासमक्ष हजर करण्यात आले. त्यानंतर, त्यांची जामिनावर मुक्तता झाली.

ही कारवाई पोलीस निरीक्षक किशोर धुमाळ यांच्या मार्गदर्शनाखाली सहायक पोलीस निरीक्षक रमेश गर्जे, आनंदसिंग साबळे, सहायक फौजदार तानाजी माने, अतिश घाडगे, संजय शिर्के, विजय कांबळे, शरद बेबले, साबीर मुल्ला, प्रवीण फडतरे, मुनीर मुल्ला, निलेश काटकर, विशाल पवार यांनी केली.

दरम्यान, ज्यांच्या सायकली चोरीस गेल्या असतील, त्यांनी स्थानिक गुन्हे शाखा, सातारा येथे संपर्क साधावा, असे आवाहन करण्यात आले आहे.