सांगली : मिरजरेल्वे जंक्शन पश्चिम महाराष्ट्रातील एक महत्त्वाचे केंद्र आहे. मात्र, याठिकाणी अत्याधुनिक सोयीसुविधा देण्यात रेल्वेने नेहमी आखडता हात घेतला आहे. त्याचा तातडीने विचार करावा आणि जंक्शन विकासासाठी निधी उपलब्ध करून द्यावा, अशी आग्रही मागणी खासदार विशाल पाटील यांनी सोमवारी पुण्यात आयोजित खासदारांसोबत झालेल्या रेल्वे प्रशासनाच्या बैठकीत केली.रेल्वेचे विविध प्रश्न समजून घेणे आणि त्यांची सोडवणूक करण्यासाठी कृती आराखडा बनवण्यासाठी या बैठकीचे आयोजन करण्यात आले होते. खासदार सुप्रिया सुळे, ओमराजे निंबाळकर, धैर्यशील मोहिते, डॉ. शिवाजी काळगे, रजनी पाटील, नितीन पाटील, मेधा कुलकर्णी, भाऊसाहेब वाघचौरे, नीलेश लंके, डॉ. अमोल कोल्हे, श्रीरंग बारणे आदींची यावेळी प्रमुख उपस्थिती होती.खासदार विशाल पाटील यांनी सांगली जिल्ह्यातील रेल्वेशी निगडित विविध प्रश्नांवर आक्रमक भूमिका मांडली. विशेषतः मिरज जंक्शनबाबत त्यांनी ‘टू द पॉईंट’ चर्चा केली. विशाल पाटील म्हणाले, मिरज रेल्वे जंक्शनवर फलाट क्रमांक १ वगळता २, ३, ४, ५, ६ याठिकाणी प्रवाशांसाठी निवारा शेड अपुऱ्या आहेत. पावसाळ्यात प्रवाशांची मोठी गैरसोय होते. सरकता जिना नाही. प्रवाशांना ओझ्यासह बॅग घेऊन जाणे अडचणीचे होते. फक्त १, ३, ४ क्रमांकाच्या फलाटावर लिफ्ट आहेत. अन्यत्र त्या बसवायला हव्यात.पॅसेंजर गाड्या फलाट क्रमांक ५, ४ व २ याठिकाणी उभ्या केल्याने दिव्यांग व ज्येष्ठ प्रवाशांचे हाल होतात. पार्किंगचा प्रश्न कित्येक वर्षांपासून तसाच आहे. पिण्याचे स्वच्छ पाणी नाही. फर्स्ट क्लाससाठी वेटिंग रूमचा अभाव आहे. स्वच्छतेचा बोजवारा असतो. पिटलाईनचे काम अद्याप पूर्ण नाही. जंक्शनमधील मॉलचे काय झाले कळत नाही. विशेष गाड्या सोडण्याबाबत नेहमी उदासिनता दाखवली जाते. चाईल्ड हेल्पलाईनला अपुरी जागा आहे. या परिस्थितीत बदल होणार आहे की नाही? मिरज मॉडेल स्थानकाचे काम लवकर सुरू करावे.सांगली-परळी एक्स्प्रेस डेमूऐवजी आयसीएफ डब्याची सोडावी. भिलवडी स्थानकावरील एफओबी ताबडतोब बांधण्यात यावा. ताकारी रेल्वे स्थानकाला महाराष्ट्र एक्स्प्रेस आणि कोयना एक्स्प्रेसचा थांबा द्यावा. मिरजमधून बेळगाव, लोंडा, कॅसलरॉक, हुबळीसाठी पॅसेंजर धावतात. त्या धर्तीवर पंढरपूर, कुर्डूवाडी, सातार पॅसेंजर गाड्या सुरू कराव्यात.
प्रमुख मुद्दे
- जत-विटा-कऱ्हाड रेल्वे लाईनसाठी सर्वेक्षण वेगाने करून निर्णय घ्यावा.
- मिरज ते कोल्हापूर, मिरज ते पंढरपूर, मिरज ते पुणे या रेल्वे लाईनवरील नवीन गाडी, पूल बांधकाम, अंडरपास रोड पावसाळ्यात पाण्याने भरून जातात. त्यावर उपाययोजनांची मागणी.
- खासदारांच्या पत्रावर रेल्वेत तिकिटांचा काळाबाजार होतो, तो थांबवण्याची सूचना.
- कोल्हापूर-वैभववाडी रेल्वे मार्गाबाबत प्रश्न उपस्थित.
- किर्लोस्करवाडी, वसगडे येथील पुलाचे काम अपूर्ण का? सांगलीत चिंतामण नगर पुलावर पथदिवे का नाहीत?
- सांगली रेल्वे स्थानकावर मालधक्क्यावर लागणाऱ्या रेल्वेंना प्लॅटफॉर्म, रॅक लवकर मिळत नाहीत. त्यात शेतकऱ्यांचे मोठे नुकसान होते.
रेल्वेच्या सांगलीतील या प्रश्नावर चर्चा
- सांगली रेल्वे स्टेशनवर टर्मिनल कोचिंग पिटलाईन व रेल्वे गाड्यांमध्ये पाणी भरण्याची सुविधा निर्माण करणे
- हुबळी-सांगली-पुणे रेल्वे मार्गावर सुरू होणाऱ्या सर्व नवीन गाड्यांना सांगली रेल्वे स्थानकावर थांबा देणे
- सांगली रेल्वे स्थानकावर निजामुद्दीन-यशवंतपूर संपर्क क्रांतीचा थांबा देणे
- सांगली रेल्वे स्टेशनवरून प्रवाशांना सोलापूर, अक्कलकोट, गाणगापूर, कलबुर्गी जाता यावे यासाठी कोल्हापूर-कलबुर्गी एक्स्प्रेस गाडीला सांगली रेल्वे स्टेशनवर थांबा देणे
- कर्नाटकातून येणाऱ्या बऱ्याच रेल्वे गाड्या उगार व मिरज तालुका दरम्यान पसंतास थांबून असतात. या गाड्यांना पुढे सांगली रेल्वे स्टेशनपर्यंत विस्तारित करून विश्रामबाग स्टेशनवर थांबा द्यावा
- सकाळी सुटणारी कुर्डूवाडी-मिरज-पॅसेंजर गाडी सांगली रेल्वे स्टेशनवरून सोडावी
- - आषाढी एकादशीनिमित्त पंढरपूरला जाणाऱ्या विशेष गाडीस सांगली रेल्वे स्टेशनवरून सोडल्यास भाविकांची सोय होईल
- हुबळी-पुणे वंदे भारत एक्स्प्रेस गाडीला किर्लोस्करवाडी व कराड रेल्वे स्टेशनवर थांबा द्यावा
- सकाळची कोल्हापूर-मिरज पॅसेंजर गाडी पुढे किर्लोस्करवाडीपर्यंत सोडावी व या गाडीला विश्रामबाग सांगली, माधवनगर, नांद्रे, भिलवडी, अमणापूर येथे थांबा द्यावा
- सांगली रेल्वे स्टेशनवर रिटायरिंग रूम व पार्सल बुकिंगची सुविधा द्यावी