सांगलीतील तरुणांचा हटके व्हॅलेंटाईन, वंचितांप्रती व्यक्त केले प्रेम

व्हॅलेंटाईन डे निमित्त नटराज फाऊंडेशनच्या कार्यकर्त्यांनी शहरातील वंचित, गोरगरिबांना अन्न व गुलाबाची फुले देऊन रोटी डे साजरा केला.

लोकमत न्यूज नेटवर्क

सांगली : शहरातील उपक्रमशील तरुणांनी आगळीवेगळी कल्पना लढवत व्हॅलेंटाईन डे साजरा केला. वंचित आणि गोरगरिबांना गुलाबाची फुले व भाजीभाकरी देत प्रेम व्यक्त केले. रोटी डे साजरा करत वंचितांप्रती प्रेम व्यक्त केले.

नटराज फाऊंडेशन व फ्युजन अकादमीच्या कार्यकर्त्यांनी अशा हटके स्टाईलने व्हॅलेंटाईन डे साजरा केला. शहरातील बेघर, भिकारी, वयोवृद्ध व अपंगांप्रती प्रेम व्यक्त केले. हे तरुण दरवर्षी वेगवेगळ्या पद्धतीने व्हॅलेंटाईन डे साजरा करतात. प्रत्येक उपक्रमामागे सामाजिक बांधीलकी जपण्याचा प्रयत्न असतो. रविवारी सकाळी गणपती मंदिरापासून उपक्रमाचा प्रारंभ झाला. प्रत्येकाने घरातून आणलेली पोळीभाजी किंवा जेवणाचा डबा शहरातील अपंग, गरीब, गरजू व्यक्तींना वाटला. प्रेमाचे प्रतीक म्हणून गुलाबाची फुले भेट दिली. गणपती मंदिर, पटेल चौक, स्टेशन चौक आदी ठिकाणी हा उपक्रम राबविण्यात आला.

उपक्रमात सूरज वाघमोडे, जगन्नाथ साळुंखे, सचिन ठाणेकर, गणेश कांबळे, वैभव चव्हाण, रिद्धी गवळी, स्वरा वाघमोडे, मुग्धा वाघमोडे, स्मित खूळ, चार्वी खूळ, समीक्षा आपटे, स्वराली आपटे, श्रेया मुधोळकर, अंजना मुधोळकर, कुलभूषण काटे, संतोष खाडे, प्रशांत डोर्ले, गीता मुधोळकर, सौरभ जतकर, चेतना खूळ आदींनी सहभाग घेतला.