वेळेत उपचार घ्या, कोरोनावर मात करा

सांगली : कोरोनाचा संसर्ग दिवसेंदिवस अधिक गंभीर बनत चालला आहे. त्यामुळे कोरोनाची बाधा झाल्यानंतर लगेच घाबरून न जाता त्यातून बरे होण्यासाठी सकारात्मक दृष्टिकोन आवश्यक आहे. कोरोनापासून बचावासाठी आवश्यक त्या खबरदारी घेण्याबरोबरच वेळेत उपचार घेतले तर कोरोनावर मात करणे शक्य आहे, असा विश्वास जिल्हा टास्क फोर्समधील तज्ज्ञ डॉक्टरांनी व्यक्त केला.

कोरोनाविषयी जनतेत असलेले संभ्रम दूर करण्यासाठी गुरुवारी डॉक्टरांनी पत्रकारांशी संवाद साधत आपले विचार मांडले. यावेळी जिल्हाधिकारी डॉ. अभिजित चौधरी उपस्थित होते.

चौकट

रेमडेसिविरचा निर्णय डॉक्टरांना घेऊ द्या

डॉ. सोमनाथ मगदूम व डॉ. अविनाश झळके यांनी सांगितले की, रेमडेसिविर इंजेक्शन दिले म्हणजे रुग्णाचा प्राण वाचेल या गैरसमजामुळे प्रत्येक रुग्णाला इंजेक्शन द्यावे यासाठी नातेवाइकांचा आग्रह असतो. परंतु, हे औषध ‘लाईफ सेव्हिंग ड्रग’ नाही. त्यामुळे ते कोणत्या रुग्णाला द्यायचे हे डॉक्टरांना ठरवू द्यावे. नातेवाइकांनी हे औषध रुग्णाला द्यावे यासाठी स्वत:हून डॉक्टरांवर दबाव टाकू नये. निदान झाल्यानंतर पहिल्या नऊ दिवसांत याचा वापर फायदेशीर ठरतो.

चौकट

सरसकट एचआरसीटी नको

डॉ. आनंद मालाणी यांनी एचआरसीटीबाबत म्हणाले, कोरोनामुळे या टेस्टचा बेसुमारपणे वापर करण्यात येत आहे. प्रत्येक कोरोना रुग्णाला एचआरसीटी स्कॅनिंगची गरज नसते. जे रुग्ण होम आयसोलेशनमध्ये आहेत, ज्यांचा ऑक्सिजन कमी होत नाही तसेच सौम्य लक्षणे असलेल्या रुग्णांना एचआरसीटीची गरज नाही. ऑक्सिजन कमी होत असल्यासच डॉक्टरांच्या सल्ल्याने चाचणी करून घ्यावी.

चौकट

योग्य वेळीच सीटी स्कॅन करा

डॉ. विनोद परमशेट्टी म्हणाले, कोरोनाचे निदान झाल्यानंतर अनेक रुग्ण पहिल्या, सातव्या, चौदाव्या दिवशी असे वारंवार एचआरसीटी स्कॅनिंग करून घेत असल्याचे दिसून येत आहे. मुळात याची काहीही गरज नाही. जे रुग्ण कोरोना उपचारासाठी आयसीयूमध्ये होते, या कालावधीत ज्यांना ऑक्सिजन दिला गेला, जे व्हेंटिलेटरवर होते, अशा रुग्णांनी २८ दिवसांनंतर सिटी स्कॅन करून घ्यावे.

चौकट

होम आयसोलेशनमध्ये सकारात्मक हवी

डॉ. अमृता दाते यांनी होम आयसोलेशनबद्दल सांगितले की, होम आयसोलेशनमध्ये बऱ्या होऊ शकणाऱ्या रुग्णांनी हॉस्पिटलमधील बेड अडवून ठेवू नयेत. कोरोनाचे ९० टक्के रुग्ण हे घरी थांबून योग्य ती खबरदारी घेऊन बरे होऊ शकतात. ज्यांना इतर आजार आहेत अशा रुग्णांनी रुग्णालयात उपचार घ्यावेत. पल्स ऑक्सिमीटरचा नियमित वापर, योग्य आहार आणि काळजी घेतल्यास होम आयसोलेशनमधूनही कोरोनावर मात करता येते.

चाैकट

लवकर निदान, लवकर उपचार आवश्यक

डॉ. प्रिया प्रभू यांनी सांगितले की, कोरोनामध्ये सर्वांत महत्त्वाची वेळ असून रुग्णाची प्रकृती गंभीर होईपर्यंत न थांबता लक्षणे दिसल्यास तत्काळ आरटीपीसीआर चाचणी करून घ्यावी. साैम्य लक्षणे असल्यास घरामध्येही मास्क वापरायला सुरू करावे. यामुळे आपण घरामध्ये होणारा प्रसार थांबवू शकतो. मास्कच्या वापरासह घरातील हवेसाठी खिडक्या, दारे उघडी ठेवावीत.

चौकट

डॉ. नाथानियल ससे म्हणाले, कोरोनातून बरे झालेल्या काही रुग्णांमध्ये मेंदूचे काही विकार, स्मरणशक्तीमध्ये अडथळा, एकाग्रतेमध्ये अडथळा असे विकार दिसून येत आहेत. हे परिणाम थोड्या कालावधीसाठी राहत असून ते हळूहळू निघून जातात. अशा विकारांबद्दल फारशी काळजी करू नये.