शिराळा नगराध्यक्षपदी सुनीता निकम बिनविरोध

शिराळा : शिराळा नगरपंचायत नगराध्यक्षपद निवडीच्या अर्ज माघारीच्या दिवशी गुरुवारी प्रतिभा पवार यांनी अर्ज मागे घेतल्याने, राष्ट्रवादी काँग्रेसच्या बांधकाम सभापती सुनीता निकम यांचा एकमेव अर्ज राहिला. त्यामुळे त्यांची नगराध्यक्षपदी बिनविरोध निवड निश्चित झाली. शुक्रवारी औपचारिक घोषणा बाकी आहे. दरम्यान, शुक्रवारी उपनगराध्यक्ष पदासाठीही निवड प्रक्रिया होणार आहे.

प्रांताधिकारी नागेश पाटील व सहायक निवडणूक अधिकारी मुख्याधिकारी योगेश पाटील यांच्याकडे सुनीता निकम व प्रतिभा पवार यांनी अर्ज दाखल केले होते. आमदार मानसिंगराव नाईक यांनी दिलेल्या निर्णयानुसार गुरुवारी उमेदवारी अर्ज माघारीच्या दिवशी प्रतिभा पवार यांनी आपला उमेदवारी अर्ज मागे घेतला. त्यामुळे बांधकाम सभापती सुनीता निकम यांची नगराध्यक्षपदी निवड निश्चित झाली आहे. फक्त औपचारिक घोषणा बाकी आहे.

शुक्रवार दि. ११ रोजी नगराध्यक्ष निवडीची घोषणा व उपनगराध्यक्ष पदाची निवड होणार आहे. उपनगराध्यक्ष पदासाठी सकाळी १० ते १२ या वेळेत उमेदवारी अर्ज दाखल करणे, तसेच लगेचच छाननी, अर्ज माघारी व वेळ पडल्यास या पदासाठी मतदान होणार आहे.

फोटो-१०सुनीता निकम