सांगली : मिरज तालुक्यातील तुंगजवळील विठलाईनगर चांदोली वसाहत येथील आठवर्षीय मुलीच्या खूनप्रकरणी अल्पवयीन मुलास ताब्यात घेण्यात आले आहे. मुलीला उसाच्या शेतात नेऊन मोबाईलवर अश्लील चित्रफित दाखवित तिच्यावर अत्याचार केला. त्यानंतर दगडाने डोक्यात मारून तिच्याच लेगीन्सने गळा आवळून खून केल्याची कबुली संशयिताने दिली आहे.
विठलाईनगर चांदोली वसाहतीमध्ये राहणारी पहिलीत शिकणारी मुलगी बुधवारी सायंकाळी दुकानातून खाऊ आणायला जाते म्हणून घरातून बाहेर गेली होती. तेव्हापासून ती बेपत्ता होती. बराचवेळ झाले तरी ती घरी न आल्याने तिच्या कुटुंबियांसह इतरांनी तिचा शोध सुरू केला होता. गुरुवारी सकाळी आठच्या सुमारास तुंंग येथील वासू पाटील यांच्या शेतात तिचा मृतदेह आढळून आला होता.
माहिती मिळताच ग्रामीण पोलिसांसह स्थानिक गुन्हे अन्वेषण शाखेचे पथक तातडीने घटनास्थळी दाखल झाले होते. घटनेचे गांभीर्य ओळखून पोलीस अधीक्षक सुहैल शर्मा, अप्पर पोलीस अधीक्षक मनीषा दुबुले यांनीही घटनास्थळी भेट देत तपासाच्या सूचना दिल्या होत्या. त्यानुसार ग्रामीण पोलीस व एलसीबीच्या पथकाने परिसरात कसून तपास सुरू केला होता. गावात मुक्काम ठोकून पथकाने तपास सुरू ठेवला होता.
बुधवारी सायंकाळी मुलगी दुकानात खाऊ आणण्यासाठी गेली असताना, दुकानाच्या पाठीमागील बाजूस उसाच्या शेतात असलेल्या चेंबरजवळ अल्पवयीन मुलासोबत ती खेळत असल्याची माहिती यावेळी पथकाला मिळाली होती. त्यानुसार त्या मुलास विश्वासात घेत विचारपूस केली असता, त्याने गुन्ह्याची कबुली दिली. त्याच्याकडून मोबाईल व गुन्ह्याच्या वेळचे कपडे जप्त करण्यात आले आहेत. पोलीस उपअधीक्षक अशोक वीरकर हे गुन्ह्याचा तपास करत आहेत.