शिवरवाडी आईपाठोपाठ गतिमंद मुलीने सोडले प्राण

२)२०चंदा बेंद्रे

विकास शहा

लोकमत न्यूज नेटवर्क

शिराळा : आपल्या पाठीमागे आपल्या गतिमंद मुलीचे कसे होणार हीच चिंता आईला होती. मात्र अवघ्या सात तासांत आईपाठोपाठ या मुलीचाही मृत्यू झाला. या घटनेने नागरिकांमध्ये हळहळ व्यक्त केली जात आहे.

शिवरवाडी (ता. शिराळा) येथे किसाबाई बेंद्रे (वय ९२) या त्यांची मुलगी चंदा (४५) तसेच भगवान बेंद्रे , मोहन बेंद्रे यांच्यासह राहत होत्या. चंदा या गतिमंद होत्या. त्यामुळे त्यांचे आपल्या पाठीमागे कसे होणार ही चिंता किसाबाई यांना कायमपणे होती. शनिवार (दि. १९) रात्री अंदाजे ११ वाजता किसाबाई यांचे ९२ व्या वर्षी अल्पशा आजाराने दुःखद निधन झाले. भगवान बेंद्रे व मोहन बेंद्रे यांच्यासह साधारण रात्री दोन वाजता अंत्यविधी पार पाडल्यानंतर शिवरवाडीचे ग्रामस्थ आपापल्या घरी गेले. रविवारी सकाळी अंदाजे सहा वाजता चंदा यांचे झोपेतच निधन झाल्याची बातमी सर्वत्र समजली. आईच्या निधनानंतर काही तासांतच मुलीचे निधन व्हावे, यामुळे अनेकांच्या मनाला धक्काच बसला.

गेली ४५ वर्षे चंदा गतिमंद अवस्थेमध्ये आपल्या कुटुंबासोबत राहत होती. किसाबाई सतत बोलत असे की, माझ्यानंतर मुलीचे काय होणार? नियतीने तिच्या या प्रश्नाची अशा प्रकारे सोडवणूक केली, अशी चर्चा सध्या गावात सुरू आहे.