पुण्यानंतर सांगलीत शिवशाही बसमध्ये तरुणीचा विनयभंग, तरुणाला अटक

पुण्यात स्वारगेट स्थानकातील अत्याचाराच्या घटनेनंतर बसस्थानक आणि महिलांच्या सुरक्षिततेचा प्रश्न चर्चेत

सांगली : पुणे ते सांगली शिवशाही बसमधून प्रवास करणाऱ्या तरुणीचा सहप्रवासी तरुणाने अश्लील चाळे करत विनयभंग केला. हा प्रकार बुधवारी रात्री अकरा ते सव्वा बारा वाजण्याच्या सुमारास आष्टा ते सांगलीदरम्यान घडला.याप्रकरणी पीडित तरुणीने सांगली शहर पोलिस ठाण्यात फिर्याद दिली आहे. पोलिसांनी वैभव वसंत कांबळे (वय ३४, रा. दुधारी मारुती मंदिराजवळ, वाळवा) याच्यावर गुन्हा दाखल करत अटक केली आहे. तत्पूर्वी प्रवाशांनी त्याला बेदम चोप दिला.शिरोळ तालुक्यातील ही २४ वर्षीय तरुणी पुण्यात नोकरीमुळे राहते. बुधवारी ती स्वारगेट ते सांगली शिवशाही बसमधून सांगलीला येत होती. संशयित वैभव कांबळे हादेखील बसमध्ये होता. रात्री ११ बस आष्टा बसस्थानकातून सांगलीकडे येत असताना त्याने खिडकीजवळून तसेच सीटच्या मधून हात काढून तिला स्पर्श केला. अश्लील चाळे करू लागला. बस सांगली स्थानकात आल्यावर तिने हा प्रकार बसचालकासह प्रवाशांना सांगितला.घटनेची माहिती मिळताच शहर पोलिस ठाण्याच्या कर्मचाऱ्यांनी तातडीने धाव घेत वैभवला ताब्यात घेतले. तरुणीने फिर्याद दिली. त्यानुसार वैभव कांबळे याच्याविरोधात गुन्हा दाखल करत अटक केली.पुण्यात स्वारगेट स्थानकातील अत्याचाराच्या घटनेनंतर बसस्थानक आणि बसमधील महिलांच्या सुरक्षिततेचा प्रश्न चर्चेत आला होता. काल पुन्हा शिवशाही बसमध्येच तरुणीचा विनयभंग केल्याच्या घटनेने खळबळ उडाली.