मिरजेत पिटबुल श्वानाचा हल्ला, बैलाचे लचके तोडले, भर रस्त्यावर थरार

हल्ला एवढा गंभीर होता की याच कुत्र्याने एखाद्या नागरिक किंवा लहान मुलांवर हल्ला केला असता तर अनर्थ घडला असता.

मिरज - पिटबुल या प्रतिबंधित श्वानाने मिरजेत रस्त्यालगत थांबलेल्या बैलावर हल्ला चढवून लचके तोडल्याने बैल गंभीर जखमी झाला. जमावाने श्वानास मार देऊन महापालिकेच्या ताब्यात दिले. यावेळी कुत्र्याच्या मालकाने पलायन केले.

मिरजेतील छत्रपती शिवाजी रस्त्यावर शिवशंकर टॉकीज समोर हमाली करणारे कृष्णा बंडगर शनिवारी दुपारी रस्त्याच्या बाजूला बैलाला बैलगाडीला बांधून घरी जेवायला घरी गेले होते. यावेळी रस्त्याने दुचाकीवरून जाणाऱ्या पिट बुल या जातीच्या पाळीव कुत्र्याने बैलगाडीला बांधलेल्या बैलावर हल्ला करून बैलाला गंभीर जखमी केले. नागरिकांनी कुत्र्याला चोप देऊन बैलाची कशीबशी सुटका केली. पिट बुल पाळीव कुत्रे मालकासोबत दुचाकीवरून जात असताना बैलगाडीजवळ कुत्रे आल्यानंतर कुत्र्याने बैलाला पाहून अचानक दुचाकीवरून उडी मारत बांधलेल्या बैलावर हल्ला केला.

बैलाच्या तोंडाचे लचके तोडत, जिभ व पायाचा चावा घेतला. यावेळी नागरिकांनी कुत्र्याला हुसकावण्याचा प्रयत्न केला. मात्र बेकाबू कुत्र्याने कोणालाही न जुमानता बैलाला गंभीर जखमी केले. हा प्रकार सुरू असताना कुत्र्याचा मालक दुचाकी वरून पळून गेला. जमावाने काठ्याने कुत्राला मारहाण करीत बैलाला सोडविले. ॲनिमल्स प्रोटेक्शन ॲन्ड शेल्टर अँनिमलचे अशोक लकडे यांनी महापालिका डॉग व्हॅनच्या मदतीने या कुत्र्याला जेरबंद केले. जखमी बैलावर उपचार करण्यात आले. जमावाच्या मारहाणीमुळे कुत्राही जखमी झाला आहे.

या प्रकारामुळे तेथे मोठी गर्दी जमली होती. हल्ला एवढा गंभीर होता की याच कुत्र्याने एखाद्या नागरिक किंवा लहान मुलांवर हल्ला केला असता तर अनर्थ घडला असता. श्वानाच्या या हल्ल्याचा थरार मोबाईल कॅमेऱ्यात चित्रित झाला आहे. शहरात मोकाट कुत्र्यांचा मोठा उपद्रव असताना आता या बेकायदा पाळीव कुत्र्यांच्या जीवघेण्या हल्ल्याबद्दल नागरिकांनी संतप्त प्रतिक्रिया व्यक्त केली.

पिटबुल पाळण्यास बंदी...

पिट बुल या जातींचे हिंस्त्र व आक्रमक श्वान पाळण्यास बंदी आहे. बंदीचे उल्लंघन करून रस्त्यावरून धोकादायक पद्धतीने श्वान नेणाऱ्या व बैल गंभीर जखमी होण्यास कारणीभूत झालेल्या श्वान मालकावर गुन्हा दाखल करणार असल्याचे ॲनिमल प्रोटेक्शन व शेल्टर या संस्थेचे अध्यक्ष अशोक लकडे यांनी सांगितले. रस्त्यावरील सिसिटीव्ही तपासुन पोलिसांनी श्वानमालकास शोधून काढण्याची मागणी अशोक लकडे यांनी केली.