परदेशामध्ये गाडी चालविण्याच्या परवान्याचे नूतनीकरणही करता येणार

लोकमत न्यूज नेटवर्क/शरद जाधव

सांगली : उपप्रादेशिक परिवहन विभाग अर्थात आरटीओकडून मिळविलेल्या आंतरराष्ट्रीय वाहन चालविण्याच्या परवान्याचे आता नूतनीकरण करणेही शक्य होणार आहे. यापूर्वी आंतरराष्ट्रीय वाहन परवान्यासाठी नूतनीकरणाचा पर्याय उपलब्ध नव्हता. केंद्र सरकारच्या या निर्णयामुळे भारतीय दुतावासात जाऊन याबाबतची प्रक्रिया परवानाधारकांना करता येणार आहे.

परदेशात नोकरी अथवा शिक्षणाच्या निमित्ताने गेलेल्या तरुणांसाठी आंतरराष्ट्रीय वाहन परवाना काढणे आवश्यक असते. त्याशिवाय त्या देशात वाहन चालविण्यास परवानगी दिली जात नाही. त्यामुळे जिल्ह्यातीलच मात्र, नोकरी, व्यवसाय आणि शिक्षणासाठी परदेशात असलेले अनेकजण परवाना काढून त्याचा परदेशात वापर करतात. हा परवाना काढताना पुन्हा चाचणी देण्याची आवश्यकता लागत नाही मात्र, सध्याचा वाहन परवाना, व्हीसासह पासपोर्टची पडताळणी करून स्थानिक अधिकारी त्यास परवानगी देतात. ही सोय आता ऑनलाईन करत अवघ्या एका दिवसात परवाना प्रक्रिया पूर्ण होत असून, याची मुदत संपल्यास आता भारतीय दुतावासातून अर्ज केल्यास त्याचे नूतनीकरणही करता येणार आहे.

चौकट

असा काढा आंतरराष्ट्रीय वाहन परवाना

१) वाहन परवाना काढण्याची प्रक्रिया आता ऑनलाईन करण्यात आली आहे.

२) हा परवाना आवश्यक असलेल्यांना ‘सारथी’वरुन ऑनलाईन प्रक्रिया करता येणार आहे. सध्याचा परवाना, व्हीसा जोडून ही प्रक्रिया होते.

३) प्रक्रिया ऑनलाईन असली, तरी कागदपत्रांची पडताळणी करूनच वाहन परवाना दिला जातो.

४) एक हजार रुपये शुल्कासह आवश्यक कागदपत्रे दिल्यानंतर ही प्रक्रिया पूर्ण केली जाते.

चौकट

कोण काढतो हा वाहन परवाना

* जिल्ह्यातील अनेक गलाई बांधव व्यवसायाच्यानिमित्ताने परदेशात स्थायिक झाले आहेत. त्यांचे यास प्राधान्य आहे.

* आंतरराष्ट्रीय पातळीवरील रोजगारांच्या संधी उपलब्ध झाल्याने जिल्ह्यातील अनेक तरुण नोकरीसाठी जाताना परवाना घेऊन जातात. यात अभियांत्रिकी क्षेत्रातील तरुणांची संख्या जास्त आहे.

* केवळ नोकरी, व्यवसायच नव्हे, तर शिक्षणासाठीही परदेशात जाणाऱ्यांचे प्रमाण वाढत आहे. अशा तरुणांसाठीही वाहन परवाना आवश्यक असतो. ते आंतरराष्ट्रीय वाहन परवाना घेतात.

कोट

आंतरराष्ट्रीय वाहन परवाना मिळविण्यासाठी आलेल्या अर्जांची पडताळणी करून तो दिला जातो. नूतनीकरणाबाबत शासन निर्देशांचे पालन करण्यात येते.

- विलास कांबळे, आरटीओ, सांगली

चौकट

कोरोनाकाळात संख्या घटली

२०१८ ४०

२०१९ ८८

२०२० २७

२०२१ १९