मिरज, कुपवाड एमआयडीसीसाठी नवे वीज उपकेंद्र लवकरच

सांगली : सांगली, मिरज व कुपवाड औद्योगिक वसाहतीमधील उद्योजकांसमवेत महावितरणचे प्रादेशिक संचालक अंकुश नाळे यांनी संवाद साधला. खंडित विजेसंदर्भात उद्योजकांनी गाऱ्हाणी मांडली. नाळे यांनी तत्काळ महापारेषणच्या मुख्य अभियंत्यांशी संपर्क साधून तक्रारींचे निराकरण केले. महावितरणची आर्थिक सद्यस्थिती स्पष्ट करून उद्योजकांनी थकीत व चालू वीज देयके भरून सहकार्य करण्याचे आवाहन केले. कृष्णा व्हॅली चेंबरच्या सभागृहात बैठक झाली. मुख्य अभियंता प्रभाकर निर्मळे, अधीक्षक अभियंता धर्मराज पेठकर, सांगलीचे प्रभारी कार्यकारी अभियंता आशिष मेहता, कृष्णा व्हॅलीचे अध्यक्ष शिवाजी पाटील, उपाध्यक्ष जयपाल चिंचवडे, सचिव गुंडू एरंडोले, संचालक हरिभाऊ गुरव, अरुण भगत, महाराष्ट्र चेंबर्स ऑफ कॉमर्सचे संचालक रमेश आरवाडे, मिरज एमआयडीसीचे अध्यक्ष संजय अराणके, उपाध्यक्ष विनोद पाटील आदी उद्योजक उपस्थित होते.

माधवनगरचे उपविभागीय अभियंता डी. बी. चिप्रीकर, मिरजेचे उपविभागीय अभियंता विजयकुमार आडके, कुपवाडचे शाखा अभियंता प्रकाश पाटील, मिरजेचे विशाल हत्तरगी यांनी बैठकीचे आयोजन केले.

चौकट

मिरज व कुपवाड वसाहतीसाठी नवीन वीज उपकेंद्राची मागणी उद्योजकांनी केली. त्याचा प्रस्ताव सादर केल्याची माहिती पेठकर यांनी दिली. वसाहतीच्या मध्यवर्ती ठिकाणी उपकेंद्रासाठी जागा उपलब्ध होणे आवश्यक आहे. त्यासाठी एमआयडीसीचे प्रादेशिक अधिकारी, उद्योजक संघटना व महावितरण अधिकाऱ्यांची संयुक्त बैठक लवकरच आयोजित करू, असे मुख्य अभियंता निर्मळे म्हणाले. वसाहतीतील ट्रान्सफाॅर्मरच्या क्षमतावाढीची कामे करणार असल्याचेही ते म्हणाले.