तासगावातील खून अनैतिक संबंधातून

सांगली : खून करून तासगावातील विहिरीत टाकलेला मृतदेह मंगसुळी येथील जेसीबीमालक हरी येडूपल पाटील (वय २५) याचा असल्याचे मंगळवारी स्पष्ट झाले. या खुनाचा उलगडा करत स्थानिक गुन्हे अन्वेषण विभागाने तांत्रिक तपासाच्या आधारावर जेसीबीवरील ऑपरेटर आणि त्याच्या पत्नीला अटक केली. अनैतिक संबंधातून हा खून झाल्याची माहिती पोलीस अधीक्षक दीक्षित गेडाम यांनी दिली.

सुनील ज्ञानेश्‍वर राठोड (वय २६), त्याची पत्नी पार्वती सुनील राठोड (वय २६, रा. येलगोड, सिंदगी, जि. विजापूर, सध्या रा. केकेनगर, तासगाव) अशी अटक केलेल्या संशयितांची नावे आहेत. पोलीस अधीक्षक गेडाम म्हणाले की, तासगाव-भिलवडी रस्त्यालगत शेतातील विहिरीत १० जून रोजी एकाचा मृतदेह प्लास्टिकच्या कागदात गुंडाळलेल्या अवस्थेत सापडला होता. त्याच्या डोक्यात धारधार शस्त्राने वार केले होते. मृतदेहाची ओळख पटवून संशयितांपर्यंत पोहोचण्याचे आव्हान पोलिसांसमोर होते.

यादरम्यान तांत्रिक माहितीच्या आधारे तासगाव नगरपालिकेच्या ठिकाणी जेसीबीचे काम सुरू असल्याची माहिती मिळाली. या जेसीबीचा मालक मंगसुळी (कर्नाटक) येथील असल्याचे तपासात समोर आले. मंगसुळी येथे जाऊन पोलीस पथकाने मृतदेहाची ओळख पटविली. मृतदेह हरी पाटील याचा असल्याचे निष्पन्न झाल्यानंतर गतीने तपास करण्यात आला. जेसीबीवरील ऑपरेटर सुनील व त्याची पत्नी पार्वती यांची नावे पुढे आल्यानंतर दोघांचा शोध घेतला. त्यांना पुणे येथून ताब्यात घेण्यात आले. दोघांकडे चौकशी केली असता खुनाची कबुली दिली.

मृत हरी पाटील याचे सुनीलची पत्नी पार्वतीशी अनैतिक संबंध होते. काही वेळा तो तिच्याशी जबरदस्ती करण्याचा प्रयत्न करत होता. त्यातून सुनीलशी त्याचा वादही झाला होता. त्यानंतर सुनीलने जेसीबीवरील काम थांबविले होते. ८ जून रोजी हरी सुनीलला पुन्हा कामावर बोलविण्यासाठी त्याच्या तासगावातील घरी आला. यावेळी पुन्हा दोघांत वाद झाला. पती-पत्नीने हरीच्या डोक्यात खोरे घालून त्याचा खून केला.

एलसीबीचे निरीक्षक सर्जेराव गायकवाड, संजीव झाडे, सहायक निरीक्षक रविराज फडणीस, संजय क्षीरसागर, उपनिरीक्षक दिलीप ढेरे, अभिजित सावंत, सुभाष सूर्यवंशी, जितेंद्र जाधव, मच्छिंद्र बर्डे, सुहेल कार्तियानी, निसार मुलाणी, संदीप पाटील, प्रकाश पाटील, कॅप्टन गुंडवाडे, शशिकांत जाधव, महादेव नागणे यांचा कारवाईत सहभाग होता.

चौकट

मृतदेह दोन दिवस घरातच

हरी पाटील याचा ८ जून रोजी डोक्यात खोरे घालून खून करण्यात आला. त्यानंतर संशयितांनी त्याचा मृतदेह दोन दिवस घरातच ठेवला होता. त्यानंतर तो प्लास्टिकच्या कागदात गुंडाळून भिलवडी रस्त्यावरील विहिरीत टाकून दिला. मृतदेह त्याच दिवशी विहिरीत तरंगू लागल्याने खुनाचा प्रकार समोर आला.

चौकट

जेसीबीसह पुण्याला पलायन

पाटील याच्या खुनानंतर सुनील आणि पार्वती राठोड यांनी कामाच्या ठिकाणी पाचशे लिटर डिझेलची चोरी केली. जेसीबीसह दोघांनी पुण्याला पलायन केले. पोलिसांनी मोबाइल लोकेशन आणि तांत्रिक बाबीचा आधार घेत पुण्यातून दोघांच्याही मुसक्या आवळल्या.