मिरजेत बाजारात खरेदीसाठी झुंबड

मिरज : लाॅकडाऊनच्या निर्बंधात सवलत मिळाल्यानंतर मिरजेत बाजारपेठेत खरेदीसाठी नागरिकांची झुंबड उडाली. नियमांचे उल्लंघन करून भाजीबाजारात गर्दी करणार्‍या विक्रेते व ग्राहकांना पोलिसांनी पिटाळले.

किराणा दुकाने, भाजीपाला विक्री चार तास सुरू झाल्याने मिरजेत मंगळवारी सकाळी बाजारपेठेत खरेदीसाठी झुंबड उडाली. बाजारपेठेत खरेदीसाठी गर्दी करणारे कोरोना विसरले होते. महापालिका व पोलिसांकडून रोखण्यात येत असतानाही कोणी जुमानत नसल्याने सोशल डिस्टन्सिंगचा फज्जा उडाला होता. अत्यावश्यक सेवा वगळता उघडलेली अन्य दुकाने पोलिसांनी बंद केली. दुकानात गर्दी जमवून नियमाचे उल्लंघन करणाऱ्या दुकानदारांना पोलिसांनी कारवाईचा इशारा दिला. लोणीबाजार परिसरात भाजीबाजारात गर्दी झाल्याने पोलिसांनी रस्त्यावरील विक्रेत्यांना पिटाळून लावले. प्रशासनाला न जुमानता रस्त्यावर भाजी बाजार व किराणा दुकानांत खरेदीसाठी गर्दी झाल्याने सोशल डिस्टन्सिंगचा फज्जा उडाला. मार्केट सोमवार पेठ, शनिवार पेठ, किसान चाैकासह बाजारपेठेत गर्दी होती. विक्रेत्यांच्या हातगाड्या पुन्हा रस्त्यावर आल्या होत्या. रस्त्यांवर व बाजारात गर्दी करणारे कोरोना संसर्गाचा धोका विसरल्याचे चित्र होेते.