सांगली/मलकापूर : भाच्याचे जावळ काढून शाहूवाडीकडे जात असताना कोल्हापूर - रत्नागिरी राष्ट्रीय महामार्गीवरील जुळेवाडी (ता. शाहूवाडी ) खिंडीच्या घाटात मोटारसायकल घसरून झालेल्या अपघातात दोघे युवक ठार झाले. सीपी आर पोलिस चौकीत याची नोंद झाली आहे. अपघातात ठार झालेल्या युवकांची नांवे ऋतूराज सुनील कुंभार वय २७ (रा. बोरपाडळे ता. पन्हाळा) युवराज पांडुरंग कुंभार वय ३२ (रा. ओकोली ता. शाहूवाडी) अशी आहेत. ही घटना दुपारी ३ वाजता घडली.
घटनास्थळावरून मिळालेल्या महितीनुसार, ओकोली येथील युवक युवराज कुंभार याची सख्खी बहिण बोरपाडळे गावात दिली आहे. तिच्या मुलाचे आज मुंज काढण्याचा कार्यक्रम होता. बहिणीने भावाला भाच्याची मुंज काढण्यासाठी निरोप दिला होता. युवराज कुंभार सकाळी आपला मित्र ऋतुराज कुंभारला सोबत घेऊन दोघेही मोटारसायकलवरुन बोरपाडळे येथे गेले होते. मुंज काढण्याचा कार्यक्रम झाल्यानंतर जेवण करुन शाहूवाडीकडे जात असताना कोल्हापूर-रत्नागिरी राष्ट्रीय महामार्गावर जुळेवाडी खिंडीच्या घाटात रस्त्यात पडलेल्या नारळाच्या पिशवी वरुन मोटार सायकल् घसरून ऋतुराज कुंभार व युवराज कुंभार रस्त्यावर पडल्याने जागीच ठार झाले. घटनास्थळी नागरिकांनी मोठी गर्दी केली होती. 'दोघांना १०८ ॲम्ब्यूलन्स मधून सी.पी.आर रुग्णालयात दाखल केले. मात्र, डॉक्टरांनी दोघांनाही मृत घोषित केले.
सी.पी.आर रुग्णालयात दोघांच्या नातेवाईकांनी गर्दी केली होती. ऋतुराज कुंभार मलकापूर येथे कंत्राटी लाईनमन म्हणून महावितरण कंपनीकडे कामाला होता. मनमिळावू स्वभावाचा असल्याने त्याचा मित्र परिवार मोठा होता. कर्त्यव्यदक्ष लाईनमन म्हणून त्याला ओळखले जात होते. या दुर्घटनेमुळे बोरपाडळे व ओकोली गावावर शोककळा पसरली आहे.