दृष्टिहीन शुभमला साहित्याने दिली नवी दृष्टी

फोटो आहे...

अविनाश कोळी

लोकमत न्यूज नेटवर्क

सांगली : दृष्टी असूनही साहित्यसौंदर्याचा आस्वाद घेण्यापासून असंख्य लोक दूर असतात. अशा परिस्थितीत दृष्टिहीन असतानाही साहित्याच्या प्रांतात रममाण होऊन त्यातून मिळालेल्या दृष्टीने जगाकडे पाहण्याची व त्यातून समाजासाठी साहित्य निर्माण करण्याची धडपड एक तरुण करीत आहे.

तासगाव येथील शुभम वाघमारे या महाविद्यालयीन अंध मुलाने ब्रेल लिपीपासून ऑडिओ बुकापर्यंतच्या माध्यमांना कवेत घेत साहित्यविश्वाला आपलेसे केले. त्याने ‘अंध व्यक्तीची प्रेमकथा’ ही कादंबरी लिहिण्यास घेतली आहे. त्याने कथा, कविता, लेख अशा ६० हून अधिक साहित्यकृती निर्माण केल्या. पुस्तकरूपातून वाचकांपर्यंत पोहोचण्याचे त्याचे ध्येय आहे. सध्या पुण्यातील वाडिया महाविद्यालयात कला शाखेतील द्वितीय वर्षात तो शिकत आहे.

मिरजेच्या कै. सुशीलाबाई दानचंद घोडावत अंध निवासी शाळेत असताना त्यास शिक्षिका अनिता गायकवाड यांनी ब्रेल लिपीचे धडे देत मार्गदर्शन केले. शुभम कित्येक वेळ येथील ग्रंथालयात ब्रेलच्या पुस्तकात रममाण व्हायचा. त्यातून त्याची साहित्यदृष्टी तयार झाली. कोरोनाच्या काळात जेव्हा सारे ठप्प झाले तेव्हा शुभमने साहित्यलेखनाला सुरुवात केली. त्याने मोकळ्या वेळेचा उपयोग केला.

भविष्यात चांगली पुस्तके समाजाला अर्पण करून चांगले कार्य करण्याची त्याची इच्छा आहे. कला शाखेतील पदवी घेतल्यानंतर त्याला लोकसेवा आयोगाच्या परीक्षेची तयारी करायची आहे. केवळ स्वप्नांना मनाच्या गाभाऱ्यात बंदिस्त करण्यापेक्षा त्यांना प्रत्यक्षात उतरविण्याची त्याची धडपड सुरू आहे. जन्मजात अंधत्वातून त्याची सुटका व्हावी म्हणून त्याच्या कुटुंबीयांनी खूप प्रयत्न केले; पण उपयोग झाला नाही. डोळ्यांच्या नसा निकामी असल्याने त्यावर उपचार होत नसल्याचे डॉक्टरांनी सांगितले. शारीरिकदृष्ट्या त्याला दृष्टी कधीही मिळणार नसली तरी शिक्षणाच्या दृष्टीने सारे जग पाहायचे, असा निश्चय त्याने केला आहे.

चौकटी

अनेक अडचणी

साहित्याचा अभ्यास करताना ब्रेल लिपीतील पुस्तकांच्या उपलब्धतेची अडचण होती. त्यामुळे जवळपास शंभरावर पुस्तके वाचून झाल्यानंतर त्याने ऑडिओ बुकचे माध्यम निवडले. त्यातून बऱ्याच गोष्टी त्याने आत्मसात केल्या.

चौकट

कुटुंबियांकडून पाठबळ

शासकीय वसतीगृहात शिपाई म्हणून त्याचे वडिल नोकरी करतात. आई, वडिलांसह त्याला एक लहान भाऊ आहे. घरात तो एकमेव दिव्यांग असून त्याला सर्वजण पाठबळ देतात.