कवठेएकंद परिसरात पशु वैद्यकीय सेवा कुचकामी

प्रदीप पोतदार

लोकमत न्यूज नेटवर्क

कवठेएकंद : कवठेएकंद (ता. तासगाव) येथील पशुवैद्यकीय रुग्णालयाची ‘असून अडचण, नसून खोळंबा’ अशी अवस्था झाली आहे. श्रेणी-१ च्या या रुग्णालयातून परिसरात पशुवैद्यकीय सेवा वेळेत मिळत नाही. यामुळे शेतकऱ्यांना खासगी रुग्णसेवेचा आधार घ्यावा लागत आहे.

कवठेएकंद येथे पशुवैद्यकीय रुग्णालयाअंतर्गत कवठेएकंद, नागाव कवठे व मतकुणकी ही गावे येतात. या तीन गावात गाई व म्हैशींची संख्या सुमारे पाच हजार २०० इतकी आहे. शेळ्या व मेंढ्या सुमारे दोन हजार आहेत. वाढलेले जनावरांचे आजार,

पशुधनाची संख्या आणि अपुऱ्या व बेभरवशाच्या वैद्यकीय सेवेमुळे पशुधन धोक्यात आले आहे. मात्र गेल्या सहा महिन्यांपासून पशुवैद्यकीय अधिकारी दिसत नाहीत.

संबंधित पशुवैद्यकीय अधिकाऱ्यांना विटा येथील रुग्णालयाचा जादा पदभार दिला आहे. तर तासगाव पशुसेवा विभागातील एका अधिकाऱ्याकडे कवठेएकंदचा अधिक भार दिला आहे. त्यांची कधीतरी येथे भेट असते. या ठिकाणी पूर्णवेळ पशुवैद्यकीय अधिकारी व परिचारक असावेत, अशी मागणी ग्रामस्थ व शेतकरी वर्गातून होत आहे.

कोट

सध्या पशुधाद्य व चारा महाग होत असल्याने उत्पादन खर्च वाढला आहे. त्यातच जनावरांच्या विविध आजारांवर खासगीत उपचार करताना मोठा खर्च होत आहे. यामुळे शासकीय पशुवैद्यकीय सुविधा मिळाल्यास शेतकऱ्यांना मदत होईल.

- सर्जेराव जाधव, पशुपालक, कवठेएकंद

कोट

कवठेएकंद येथे गेल्या काही वर्षांपासून जनावरांचे आजार वाढल्याने सामान्य शेतकऱ्यांना औषध खर्च परवडत नाही. पशुपालन व्यवसाय तोट्याचा ठरत आहे. वर्षभरात दोन जनावरे विकून टाकली.

- शिवाजी गुरव, शेतकरी, कवठेएकंद