पुनवतच्या युवकांकडून परदेशात जहाजावर गणेशोत्सव

सहदेव खोत

लोकमत न्यूज नेटवर्क

पुनवत : व्यापारी जहाजांवर (मर्चंट नेव्ही) काम करणाऱ्या पुनवत येथील युवकांनी परदेशात जहाजावर पर्यावरणपूरक गणेश मूर्तीची स्थापना करून सांस्कृतिक परंपरेचे जतन केले आहे. या उत्सवात परदेशी नागरिकही सहभागी झाल्याने हा आनंद द्विगुणित झाला आहे.

पुनवत (ता. शिराळा) येथील अनेक युवक मर्चंट नेव्हीमध्ये काम करतात. नोकरीनिमित्त सातत्याने परदेश दौऱ्यावर असतात. सध्या गावातील विजय वरेकर, जितेंद्र जाधव, प्रवीण पाटील, सुनील कदम, रमेश जाधव, शिवाजी उपलाने, विजय पाटील, रविकिरण खोत, तानाजी यादव आदी युवक जहाजावर काम करत आहेत. सध्या गणेशोत्सव सुरू असल्याने प्रवीण पाटील, विजय वरेकर, रमेश जाधव यांनी चीनजवळ पिवळ्या समुद्रात असलेल्या जहाजावर, तर जितेंद्र जाधव यांनी सिंगापूरमधून मूर्ती मागवून सहकाऱ्यांच्या मदतीने चीनमधील दोंगजियाकाऊ येथे जहाजावर गणपतीची प्रतिष्ठापना केली आहे. दोन्ही ठिकाणी मातीपासून बनवलेल्या पर्यावरणपूरक मूर्ती बसविल्या आहेत. अन्य ठिकाणीही हे मराठमोळे युवक गणेशोत्सव साजरा करत आहेत. या उत्सवात भारताबरोबरच श्रीलंका, बांगलादेश, इथिओपिया आदी देशांतील त्यांचे सहकारी सहभागी झाले आहेत.

पारंपरिक आरती, भजन, महाप्रसाद असे कार्यक्रम होत आहेत. गणेशविसर्जनाच्या दिवशी या मूर्तींची जहाजावर मिरवणूक काढून विधिपूर्वक समुद्राच्या पाण्यात विसर्जित करणार असल्याचे या युवकांनी सांगितले.

चौकट

सांस्कृतिक परंपरेचे जतन

परदेशात जहाजावर मराठमोळा उत्सव साजरा करून सांस्कृतिक परंपरेचे जतन या युवकांकडून होत आहे. गतवर्षी पुनवतच्या आनंदा आंबरे यांनी टांझानिया देशात हा उत्सव साजरा केला होता.