महापौर बेदखल, उपमहापौर नाॅट रिचेबल

सांगली : महापालिकेच्या महापौर, उपमहापौर निवडीवरून भाजपमधील नाराजीनाट्य संपता संपेना. रविवारी प्रदेशाध्यक्ष चंद्रकांत पाटील यांच्या उपस्थितीत झालेल्या नगरसेवकांच्या बैठकीतही काही सदस्यांनी नाराजी व्यक्त केली. महापौर गीता सुतार यांची मुदतवाढीची मागणी नेत्यांनी बेदखल केली तर उपमहापौर आनंदा देवमाने हे बैठकीला गैरहजर राहिले. बैठकीनंतर आयोजित स्नेहभोजनालाही काही नगरसेवकांनी दांडी मारल्याचे समजते. त्यामुळे महापौर पदासाठी इच्छुक असलेल्यांची धाकधूक वाढली आहे.

महापालिकेत भाजपला कसलीच अडचण नाही, महापौर हा भाजपचाच होणार, असे प्रदेशाध्यक्ष पाटील यांनी जाहीर केले असले तरी पक्षातंर्गत नाराजी अद्याप संपलेली नाही. महापौर, उपमहापौर निवडीसाठी येत्या १८ रोजी उमेदवारी अर्ज दाखल करायचे आहेत. या पार्श्वभूमीवर भाजपमध्ये नाराजी नाट्य सुरू झाले आहे. यापूर्वी अनेकदा पक्षाच्या बैठकीत उपमहापौर देवमाने यांनी उघडपणे कारभाराबद्दल नाराजी व्यक्त केली होती. आता तर ते प्रदेशाध्यक्षांच्या बैठकीला गैरहजर राहिले. शिवाय गेल्या दोन दिवसापासून त्यांचा दूरध्वनीही बंद येत आहे.

दुसरीकडे महापौर गीता सुतार यांनी सहा महिने मुदतवाढ देण्याची मागणी केली आहे. भाजपच्या नेत्यांनी आपल्याला शब्द दिल्याचे त्यांचे म्हणणे आहे. बैठकीत त्यांनी प्रदेशाध्यक्ष पाटील यांच्याकडे मुदतवाढीची मागणी करताना दिलेल्या आश्वासनाची आठवण करून दिली. पण पाटील यांनी असा कोणताच शब्द आपण दिला नसल्याचे सांगत त्यांना बेदखल केले. सुतार यांनी काही नगरसेवकांची साक्ष काढण्याचाही प्रयत्न केला. पण या नगरसेवकांनी त्यावर मौन पाळले. एकूणच भाजपमध्ये सारे काही आलबेल नाही. नगरसेवकांची नाराजी दूर करण्याचे आव्हान नेत्यासमोर आहे.

चौकट

मला पद नको

बैठकीत मिरजेतील एका नगरसेवकाने तर उघडपणेच नाराजी व्यक्त केली. आधी या नगरसेवकाने नेत्यांना नमस्कार केला. त्यानंतर तुम्ही मला पद देण्याचे आश्वासन दिले होते. पण अडीच वर्षात काही पद दिले नाही. आता मला कुठलेही पद नको, असे म्हणत ते बैठकीतून निघून गेले.