महापालिकेच्या मदतीला धावले काॅलेजचे डाॅक्टर, विद्यार्थी

फोटो ओळी : महापालिका क्षेत्रातील होमआयसोलेशनमधील रुग्णांवर लक्ष ठेवण्यासाठी पृथ्वीराज पाटील फौंडेशनच्यावतीने डाॅक्टर, नर्सेसचे पथक कार्यरत करण्यात आले. यावेळी आयुक्त नितीन कापडणीस, पृथ्वीराज पाटील, अभिजित भोसले, शीतल धनवडे उपस्थित होते.

लोकमत न्यूज नेटवर्क

सांगली : महापालिका क्षेत्रातील होमयसोलेशनमध्ये असलेल्या रुग्णांवरील उपचारावर लक्ष ठेवण्यासाठी पृथ्वीराज पाटील फौंडेशन धावून आले आहे. या फौंडेशनने गुलाबराव पाटील होमिओपॅथी महाविद्यालयातचे डाॅक्टर, शिकावू विद्यार्थी आणि नर्सेस असे ६१ जणांचे पथक शुक्रवारपासून महापालिकेच्या मदतीसाठी कार्यरत झाले.

महापालिकेच्या हनुमाननगर येथील आरोग्य केंद्रात या उपक्रमाचा प्रारंभ काँग्रेसचे शहर जिल्हाध्यक्ष पृथ्वीराज पाटील, आयुक्त नितीन कापडणीस यांच्या उपस्थितीत झाला. यावेळी स्थानिक नगरसेवक अभिजित भोसले, वैद्यकीय आरोग्यधिकारी डॉ. सुनील आंबोळे, डॉ. पृथ्वीराज धनवडे, डॉ. शीतल धनवडे उपस्थित होते.

यावेळी आयुक्त कापडणीस म्हणाले, महापालिका क्षेत्रात दीड हजारहून अधिक रुग्ण होमआयसोलेशनमध्ये आहेत. या रुग्णांची काळती व नियमांचे पालन होते की नाही, यावर आशा वर्कर लक्ष ठेवत आहेत. एका प्रभागात १५० हून अधिक रुग्ण असल्याने आशा वर्कर्सवर कामाचा ताण वाढला आहे. त्यामुळे पृथ्वीराज पाटील फौंडेशन आणि स्व. गुलाबराव पाटील होमिओपॅथी कॉलेजकडून होमयसोलेशनसाठी त्यांचे डॉक्टर, नर्सेस तसेच शिकावू विद्यार्थी हे महापालिकेच्या मदतीसाठी पाठविले आहेत. यामुळे होमआयसोलेशन असलेल्या प्रत्येक रुग्णांवर दैनंदिन लक्ष ठेवणे सोपे होणार आहे.

पृथ्वीराज पाटील म्हणाले, प्रत्येक प्रभागात दोन डॉक्टर, दोन नर्सेस आणि अन्य स्टाफ यांच्याकडून गृहभेटी देऊन होमआयसोलेशनमधील व्यक्तीची काळजी घेतील. त्यांच्या प्रकृतीवर लक्ष ठेवून त्याचा चार्ट ठेवला जाईल. शिवाय कॉल सेंटरमधून त्यांना दिवसातून तीन वेळा कॉल करून माहिती घेतली जाईल. २१ डॉक्टर आणि २० नर्सेस व अन्य असा ६१ जणांचा स्टाफ कार्यरत असणार आहे.

यावेळी डॉ. जिनेश्वर एलिगोडा, डॉ. सुहास पाटील, डॉ. संतोष भोजगे, डॉ. प्रताप भोसले, नर्सिंग स्टाफ शैलेंद्र मालप, सोनिया भोरे, प्रफुला आवळे, तृप्ती कुरणे, प्रतीक्षा लोखंडे, रोहिणी मोरे, आफ्रिन मंगळवारे, बिपिन कदम, आयुब पटेल, रविराज खराडे उपस्थित होते.