यशवंतराव मोहिते पतसंस्थेच्या ठेवी परत मिळेनात!

अशोक पाटील

लोकमत न्यूज नेटवर्क

इस्लामपूर : रेठरे बुद्रुक (ता. कऱ्हाड) येथे मुख्य शाखा असलेल्या यशवंतराव मोहिते पतसंस्थेचे ठेवीदार अडचणीत आले आहेत. कासेगाव (ता. वाळवा) येथील शाखेचे ठेवीदार दीड वर्षापासून हेलपाटे घालत आहेत, मात्र ठेवीची रक्कम परत मिळण्याऐवजी उडवाउडवीची उत्तरे मिळत आहेत. त्यामुळे ते आंदोलनाच्या पवित्र्यात आहेत.

कासेगाव येथील संतोष बाळकृष्ण पाटील (११ लाख २० हजार), बाबूराव भाऊ माने (२ लाख ५० हजार), अक्षय बाबूराव माने (१ लाख ४८ हजार), इलाई दादासाहेब आत्तार (२ लाख २५ हजार), ताराचंद रामलाल प्रजापती (२ लाख) यांनी मुदत ठेव, अल्पबचत (पिग्मी) या माध्यमातून सुमारे २० लाख रुपये पतसंस्थेत गुंतवले आहेत. त्यांनी गेल्या दीड वर्षापासून रेठरे बुुद्रुकच्या मुख्य शाखेसह मलकापूर, कासेगाव शाखेत जाऊन ठेवी मागण्याचा प्रयत्न केला. परंतु तेथे शिपायाशिवाय कोणीही कर्मचारी जागेवर नसतात. त्यामुळे सर्वांनी संस्थापक डॉ. इंद्रजित मोहिते यांची भेट घेऊन त्यांना निवेदन देण्याचा प्रयत्न केला. परंतु त्यांनी निवेदन स्वीकारले नाही. हे निवेदन मलकापूर शाखेतील शिपाई या पदावरील कर्मचाऱ्याने स्वीकारले. हे ठेवीदार पैसे बुडतील या भीतीपोटी सैरभैर झाले आहेत.

काही महिन्यांपूर्वी या खातेदारांनी डॉ. इंद्रजित मोहिते यांची भेट घेतली. त्यावेळी त्यांनी, ‘तुमच्या रकमेला मी जबाबदार आहे. माझ्या वडिलांच्या नावाने ही संस्था स्थापन केली आहे. त्यामुळे वडिलांच्या नावाला कोणतेही गालबोट लागणारे कृत्य करणार नाही’, अशी ग्वाही ठेवीदारांना दिली होती. पैशाची जबाबदारी घेतली आहे. परंतु आजअखेर पैसे परत मिळाले नसल्याने गुंतवणूकदार आक्रमक झाले आहेत.

चौकट

सचिवानेही दाद घेतली नाही

ठेवी परत मिळण्यासाठी संबंधित ठेवीदारांनी संस्थेचे सचिव गणेश गरुड यांची वारंवार भेट घेतली; परंतु त्यांना गरुड यांनी कसलीही दाद दिली नाही. आता या संस्थेतील कारभार एखादा कर्मचारी किंवा शिपाई पाहत आहेत.

कोट

माझ्या वडिलांच्या नावे असलेली ही संस्था आहे. यामध्ये काही आर्थिक व्यवहार झाले आहेत. त्याच्या ताळेबंदाची माहिती घेणार आहे. वडिलांच्या नावाने संस्था असल्याने त्याची पूर्ण जबाबदारी मी घेत आहे. ताळेबंदाचा अहवाल आल्यानंतरच यावर बोलू.

- डॉ. इंद्रजित मोहिते, संस्थापक, यशवंतराव मोहिते पतसंस्था