पणूंब्रे वारुणला वीरगळ स्मारकाचे लोकार्पण

शिराळा तालुक्यामध्ये सापडणारे वीरगळ प्राचीन गौरवशाली इतिहासाची साक्ष देत आहेत. पण काळाच्या ओघात या वीरगळांचे महत्त्व कमी झाले आणि त्यांची दुरवस्था झाली. असेच दुरवस्थेमध्ये असणारे वीरगळ पणूंब्रे वारुणमधील युवकांनी संवर्धित करण्याचे ठरविले.

श्री शिवप्रतिष्ठान मंडळाच्या तरुणांनी एकत्र येऊन हे कार्य पूर्णत्वास नेले.

सुरुवातीला गावातील लोकांना वीरगळ म्हणजे काय हेच माहीत नव्हते. त्यासाठी सामाजिक माध्यमांचा योग्य तो वापर करून संपूर्ण गावामध्ये जनजागृती केली. लोकांना वीरगळांचे महत्त्व पटल्यानंतर महादेव मंदिर परिसरातील वीरगळ संवर्धनाला सुरुवात केली. लागोपाठ तीन संवर्धन मोहिमा घेऊन वीरगळ परिसर स्वच्छ केला आणि त्यानंतर स्मारक उभारण्याला सुरुवात केली.

स्मारक उभारायचे म्हणजे आर्थिक निधी महत्त्वाचा. अशा वेळी लागणारा सर्व खर्च गावच्या विकासासाठी, समाजसेवेसाठी सदैव तत्पर असणाऱ्या श्री शिवप्रतिष्ठान कला, क्रीडा, सामाजिक आणि सांस्कृतिक मंडळाने उचलला. त्यामुळे स्मारक उभारणीच्या कार्याला गती मिळाली आणि अवघ्या काही दिवसांत स्मारक उभा राहील.

वीरगळ हे आपल्या पूर्वजांनी केलेल्या पराक्रमाची साक्ष देत असतात. त्यांचे जतन आणि संवर्धन होणे गरजेचे आहे. तसेच वीरगळविषयक जनजागृतीची गरज आहे. लोकांनी हा वारसा जपायला हवा, असे वीरगळ अभ्यासक विनोद निंबाळकर यांनी सांगितले.

यावेळी माजी सभापती हणमंतराव पाटील, सरपंच वंदना बनसोडे, उपसरपंच सर्जेराव पाटील उपस्थित होते. अमित पाटील यांनी प्रास्ताविक केले. शिवाजी पाटील यांनी आभार मानले.

चौकट

शिराळ्यामधील पहिले वीरगळ स्मारक पणूंब्रे वारुण येथे उभा राहिलेय ही सर्व गावकऱ्यांसाठी अभिमानाची बाब आहे. भेट देणाऱ्या सर्वांचे स्वागतच राहील,अशीच स्मारके गावोगावी उभारायला हवीत,जेणेकरून येणाऱ्या पिढ्यांना गावचा इतिहास समजेल.

-विनायक शंकर पाटील(वीरगळ अभ्यासक,पणूंब्रे वारुण)