दारुबंदी डमी????????????????

सांगली : जिल्ह्यात गावात १६८ गावांत शंभर टक्के दारुबंदी आहे., पण सध्या नावापुरतीच उरल्याचे दिसत आहे. गावकऱ्यांनी आणि विशेषत: महिलांनी मोठी जनआंदोलने उभी करुन बाटली आडवी केली, पण ठोस कारवाई अभावी ती पुन्हापुन्हा उभी राहत असल्याचे चित्र आहे.

सोनी, बिसूर, कवठेपिरान अशा काही गावांत बाटली आडवी करण्यासाठीची आंदोलने मोठ्या चर्चेची ठरली. महिलांनी दारुविरोधात आघाडी उघडून दुकानांना टाळे ठोकायला भाग पाडले. पण याच गावांत आता चोरटी विक्री पुन्हा जोमात आहे. सोनीमध्ये दुकान नाही, पण शेजारच्या मणेराजुरीतून दारु आणून विकली जाते. ७० रुपयांची बाटली शंभरला मिळते. काही पानपट्ट्या खास दारुसाठी प्रसिद्ध आहेत. शौकीनांना त्या नेमक्या माहिती आहेत. गावाभोवताली काही अड्ड्यांवरही रात्री उशिरापर्यंत मैफली जमतात. तक्रार येताच किंवा माहिती मिळताच पोलीस कारवाई करतात, पण पुन्हा येरे माझ्या मागल्या सुरु होते. दारुविरोधी महिलांचा विक्रेत्यांवर अद्याप बराच वचक आहे हीच काय ती दिलाशाची बाब आहे.

पुन्हा आंदोलन छेडणार

कुमठे (ता. तासगाव ) येथे आम्ही दारुविरोधात जोरदार आंदोलन केले. महिलांच्या उठावाने बंदोबस्त झाला. दारु दुकान सुरु झाले नाही. गावात सध्या सरकारमान्य विक्री नाही, पण अवैध विक्रीमुळे महिला त्रस्त आहेत. चोरुन दारु आणली जाते. याच्या कायम बंदोबस्तासाठी पुन्हा आघाडी उघडणार आहोत.

- डॉ. भारती पाटील, दारुविरोधी आंदोलक, कुमठे

बाहेरुन आणून विक्री

सोनीमध्ये २०१० मध्ये महिलांनी उठाव केला. बाटली आडवी केली. पण शंभर टक्के बंदोबस्त झाला नाही. सध्या चोरुन दारु विकली जाते. पोलीस कारवाई होते, पण नंतर विक्रेते पुन्हा अड्डा जमवतात. मणेराजुरीतून दारु आणली जाते. बंदोबस्तासाठी महिलांना निर्णायक उठाव करणार आहोत.

- चंपाताई जाधव, दारुविरोधी आंदोलक, सोनी

पोलीसांत तक्रार करणार

गावात गेल्याच आठवड्यात पोलीसांनी कारवाई केली होती. काहीजणांना ताब्यात घेतले होते. त्यांनी सुटकेनंतर पुन्हा विक्री सुरु केली आहे. गावात दुकान नाही, पण शेजारच्या गावातून आणून विकली जाते. यासंदर्भात महिलांनीही ग्रामपंचायतीकडे तक्रारी केल्या आहेत. आम्ही पोलीसांना भेटून तक्रार करणार आहोत.

-राजू माळी, सरपंच, सोनी, ता. मिरज.

-----------