आशा सेविकांच्या आंदाेलनाने काेराेना सर्वेक्षणास खीळ

लाेकमत न्युज नेटवर्क

कडेगाव : आशा स्वयंसेविका आणि गटप्रवर्तकांचा विविध मागण्यांसाठी १५ जूनपासून राज्यव्यापी बेमुदत संप सुरू आहे. यामुळे संशयित कोरोना रुग्णांचा शोध घेण्यासाठीच्या कॉन्टॅक्ट ट्रेसिंग आणि कोरोना सर्वेक्षणाला खीळ बसली आहे. आरोग्य सेविका आणि कर्मचाऱ्यांवर कामाचा ताण वाढल्याचे चित्र कडेगाव तालुक्यात दिसत

आहे.

महाराष्ट्र राज्य आशा-गटप्रवर्तक कर्मचारी कृती समितीच्या वतीने पुकारण्यात आलेला संप मागण्यांची पूर्तता होईपर्यंत चालूच ठेवणार असल्याचे संघटनेच्या वतीने सांगण्यात आले आहे. या संपामुळे कॉन्टॅक्ट ट्रेसिंगच्या कामालाच खीळ बसली आहे. कोरोना

चाचण्यांचे प्रमाण कमी झाले आहेत.

गृह विलगीकरणात असलेल्या कोरोनाबाधित रुग्णांच्या पल्स आणि ऑक्सिजन

तपासणीसाठी आरोग्य विभागाची कर्मचारी संख्याच अपुरी पडत आहे. कोरोनाची

लढाई जिंकण्यासाठी सर्वतोपरी

प्रयत्नशील असलेल्या आरोग्य

विभागाला आरोग्य सेवेचा कणा असलेल्या

आशा स्वयंसेविकांची मदत मिळेनाशी झाली आहे.

कोविड काळातील कामाचा अतिरिक्त मोबदला द्यावा, माझे कुटुंब-माझी जबाबदारी या मोहिमेचा स्वतंत्र मोबदला द्यावा, आशा स्वयंसेविका व गटप्रवर्तकांना कायम नियुक्तीचे पत्र द्यावे, आशा व गटप्रवर्तकांच्या नियमित वेतनात भरीव वाढ करावी, आशा स्वयंसेविका व गटप्रवर्तक संघटनेने अशा मागण्या

केलेल्या आहेत. मात्र राज्य शासनाने

याबाबत अद्याप निर्णय घेतलेला नाही.

यामुळे आशा स्वयंसेविकांचा बेमुदत

संप सुरूच आहे. याचा परिणाम कोरोना नियंत्रण मोहिमेवर होत आहे.

चौकट :

माघार नाही, सांगलीला जाणार

सोमवारी आम्ही सांगलीला जाणार आहोत. पालकमंत्री जयंत पाटील यांच्या संपर्क कार्यालयासमोर निदर्शने करणार

आहोत. आम्ही जसे कोरोनाविरुद्ध

रणरागिणीसारखे लढलो तसे आता

हक्कासाठी लढणार आहोत. आता माघार नाही. असे कडेगाव तालुक्यातील आशा स्वयंसेविकांनी सांगितले.