जिल्ह्यात ४८७ जणांना सर्पदंश

लोकमत न्यूज नेटवर्क

सांगली : जिल्ह्यातील सर्पदंशाच्या घटनांमध्ये वाढ होत आहे. मात्र, येथील शासकीय रुग्णालयात वेळेत उपचार होत असल्याने सर्पदंश झालेल्यांचे प्राणही वाचत आहेत. त्यामुळेच वर्षभरात ४८७ जणांना सर्पदंश झालेला असतानाही मृत्यूचे प्रमाण कमी असून वर्षभरात चाैघांचा मृत्यू झाला आहे. २०१९ पेक्षा सर्पदंशाच्या घटनांमध्ये मात्र वाढ झाली आहे.

शेतीमध्ये काम करत असताना किंवा अडगळीत वस्तू घेताना विशेषकरून सर्पदंशाच्या घटना घडत असतात. त्यातही थंडीच्या दिवसात गारव्याच्या ठिकाणी सर्पदंशांच्या घटना वाढतात.

सांगली जिल्ह्यासह कोल्हापूर, सोलापूर आणि शेजारच्या कर्नाटक राज्यातील सर्पदंश झालेल्या रुग्णांसाठी शासकीय रुग्णालयात सर्वांत प्रभावी उपचार केले जातात. अगदी जहाल विषारी सापाचा दंश झालेला असला तरी वेळेत उपचार सुरू केल्यास व प्राथमिक खबरदारी घेतल्यास त्या रुग्णाचा जीव वाचल्याची अनेक उदाहरणे आहेत. जिल्ह्यात सर्पदंशासह उंदीर, विंचू, श्वानदंशाच्याही घटनांमध्ये वाढ झाल्याचे चित्र आहे. यावरही जिल्हा रूग्णालयात तातडीने उपचार केले जात आहेत.

चौकट

साप चावताच काय काळजी घ्यावी

बेसावधपणे कुठे हात घातला किंवा पाय पडला तर सर्पदंश होऊ शकतो. त्यामुळे सर्पदंश झालेल्या व्यक्तीने घाबरून जावू नये. सुरूवातीला दंश झालेला साप कोणता आहे याची माहिती घेतल्यास बराच ताण कमी होऊ शकतो तरीही दंश झालेल्या ठिकाणी दाह होत असल्यास तातडीने त्या जवळ दोरीने घट्ट आवळून प्रवाह शरीरात भिनणार नाही याची काळजी घ्यावी. त्याचबरोबरच त्याठिकाणी छोटाचा व्रण करून तेथील रक्त काढणेही प्रभावी ठरू शकते.

साप चावताच काय काळजी घ्यावी

चौकट

जिल्ह्यात आढळणारे साप

जिल्ह्याची भौगोलिक रचना वेगळी असल्याने आढळणारे सापही वेगवेगळे आहेत. त्यातही नाग, घोणस या विषारी सापांचे प्रमाण आहे याशिवाय धामण, गवत्या आदी सापांचेही प्रमाण आढळत आहे. जास्त अडगळ असलेल्या ठिकाणी घोणससारखा साप आढळतो तर शेतामध्ये, वारूळाजवळ आणि गारवा असलेल्या भागात नागाचे प्रमाण असल्याचे सर्पमित्रांनी सांगितले.

चौकट

दोन वर्षांतील घटना

महिना २०१९ २०२०

जानेवारी २६ १९

फेब्रुवारी १९ १३

मार्च २५ २०

एप्रिल ३१ ३५

मे ३८ ३६

जून ४९ ६५

जुलै ५७ ८४

ऑगस्ट ३८ ३३

सप्टेंबर ३६ ५२

ऑक्टोबर २७ ७०

नाेव्हेंबर २४ ५३

डिसेंबर १८ ०७